Biznesmenlər milyon manatlıq iflasdan sonra növbəti maliyyə itkilərilə üzləşiblər

Azərbaycanda biznesə başlamağın nə qədər təhlükəli olması barədə

FB Company ticarət şirkətinin ortaqları, iki sahibkar - Anar Qəribov və Ağa Əliyev onların biznesini dağıdan və bir milyon manatdan çox ziyan vuran “Azur” Ticarət Mərkəzinə qarşı işi Bakı Apellyasiya Məhkəməsində uduzduqdan bir il sonra yenidən məhkəmə qarşısına çıxmalı və yeni itkiyə məruz qalmalı olacaqlar. İddiaya əsasən, anbarın sahibi Raziyə Babayeva FB şirkətinə məxsus ticarət avadanlıqlarının, geyimlərin, aksessuarların və digər əşyaların onun yerindən çıxarılması və daşınma xərclərinin şirkətin hesabına ödənilməsilə bağlı Bakı Şəhər Binəqədi Rayon Məhkəməsinə müraciət edib. Şirkətin avadanlıqlarının  və geyimlərinin onun anbarında beş il saxlanmasına və bir sıra məhkəmə iclaslarına baxmayaraq,  Babayeva heç vaxt öz hüquqları barədə bildirməyib. Qəribov və Əliyev bu sahibkar haqqında ilk dəfə bu yaxınlarda xəbər tutublar.

FB Company və “Azur” Ticarət Mərkəzi arasında məhkəmə çəkişməsi Turan İnformasiya Agentliyinin məqalələrində geniş işıqlandırılıb.

Qısaca deyək ki, “Azur” FB Company ilə müqaviləni pozub, bir milyon manatdan çox məbləğdə yeni brend geyim, aksessuar və ticarət avadanlıqlarının ticarət mərkəzindən çıxarılmasını tələb edib. Qəribov və Əliyev bundan imtina ediblər, çünki ticarət sahəsinin icarə müqaviləsi hələ bitməyib. 26 dekabr 2020-ci ildə “Azur” rəhbərliyi - Fuad Rzayev və Babək Babayev əmlakın Bakının digər rayonunda, ticarət mərkəzindən uzaqda yerləşən qeyri-yaşayış sahəsinə daşınmasına göstəriş veriblər. Vaxt keçdikcə sahiblərinin xəbəri olmadan məhsul və avadanlıqlar nəmlənib, paslanıb, kiflənib və onları qurd basıb. İnfeksiyanın qarşısını almaqdan ötrü malları insan sağlamlığı üçün təhlükəli olan zəhərli insektisidlərlə dezinfeksiya etmək lazım gəlib. Ticarət  mərkəzində geyim  satmaq və ya avadanlıqdan istifadə etmək mümkün olmayıb.

Qəribov və Əliyevə xəbərdarlıq edilmədən əşyalar  Kommersiya  mərkəzinin rəhbərliyi tərəfindən daşındığına  və başqa yerə yerləşdirildiyinə görə Bakı İnzibati Məhkəməsi əmlakın saxlanması üçün FB Company şirkətindən icarə haqqı tutulması ilə bağlı “Azur”un iddiasını təmin etməyib.

Biznesi dağıdılan və bir neçə məhkəmə çəkişməsinə baxmayaraq, kompensasiya almayan iki biznesmen indi də yeni məhkəmə qərarı ilə üzləşib. Onlardan təhlükəli geyimlərin, aksessuarların və digər əşyaların çıxarılması və utilizasiyası xərclərinin ödənilməsi tələb olunur.  2023-cü ildə məhkəmə ekspertizası təsdiqləyib ki, bu əşyaların yanında olmaq sağlamlığa təhlükə yaradır.

Qəribov Turan agentliyinə bildirib ki, anbar DDT və onun metabolitləri ilə dezinfeksiya edilib. DDT həşəratları öldürmək üçün hazırlanmış kimyəvi maddədir, lakin insanlar üçün təhlükəlidir. Kiçik və orta dozalarda zəhərlənməyə səbəb olur, böyük dozalarda isə xərçəngə, hətta ölümə səbəb ola bilər.

Korlanmış və yoluxmuş əşyaları çıxarmaq və utilizasiya etmək üçün mütəxəssislər, avadanlıq və vəsait lazımdır. Qəribov və Əliyev maliyyə  zərərinə uğrayıblar, ticarət mərkəzinin sahibləri Rzayev və Babayev tərəfindən müflis olunublar. Zəhərli maddələrin ətraf mühitə atılması riski var, çünki onlardan məqsədli istifadə artıq mümkün deyil, ixtisaslaşdırılmış utilizasiya üçünsə sahibkarların vəsaiti yoxdur.

Qəribov hesab edir ki, bu yeni gözlənilməz iddia ilə “Azur” sahibləri Rzayev və Babayev əvvəlki məhkəmə proseslərində uğurla tətbiq etdikləri "inzibati resurs"dan, o cümlədən sahiblərdən birinin yüksək vəzifəli dövlət məmuru olan atasının köməyindən istifadə edərək öz opponentlərinin "axırına çıxmağa" çalışırlar.

Raziyə Babayevanın vəkili Turan-ın suallarını cavablandırmaqdan imtina edib.

Bu proses haqqında əvvəlki məqalələr:

• Sahibkar məhkəmə çəkişməsi şəraitində ədalət üçün prezidentə müraciət edir
• “Azure” Ticarət Mərkəzinin günahı ucbatından bir milyon manatdan çox iflasa uğradığını bildirən biznesmenin iddiası üzrə məhkəmə başlayıb
• Bakı Apellyasiya Məhkəməsi mətbuatın FB-Company-nin Azure Ticarət Mərkəzinə qarşı iddiası üzrə prosesi müşahidə etməsini qadağan edib
• Bakı Apellyasiya Məhkəməsi “Azur” və FB-Company şirkətləri arasındakı məhkəməyə jurnalistlərin buraxılmaması barədə qərarını ləğv edib
• Apellyasiya Məhkəməsinin ziddiyyətli bəyanatlarının arxasında kim durur?
• Məhkəmə, polis, prokurorluq- kimin femidası üstün gələcək
• "Şəhərin ticarət şəbəkəsinə təhlükəli kimyəvi maddələrlə emal edilmiş paltarlar düşə bilərdi"
• Bakı Apellyasiya Məhkəməsi FB-Company-nin biznesini dağıdan “Azur” firmasının hərəkətlərinə haqq qazandırıb