![Bloger Rəşad Ramazanov 9 il azadlıqdan məhrumetmə cəzasına məhkum edilib](https://turan.az/resized/media/2013/main/111300057370-750-500-resize.webp)
Bloger Rəşad Ramazanov 9 il azadlıqdan məhrumetmə cəzasına məhkum edilib
Bu gün Ağır Cinayətlərə dair İşlər üzrə Bakı Məhkəməsində qanunsuz narkotik ticarətində ittiham olunan bloger Rəşad Ramazanovun (Rəşad Ağaaddin) işi üzrə proses yekunlaşıb.
Ramazanov ittihamı rədd edib və facebook.com sosial şəbəkəsində tənqidi yazılarına görə siyasi motivlərlə təqib olunduğunu bildirib.
Onun vəkili Azər Nağıyev də ittiham tərəfin Ramazanovun təqsirini sübuta yetirmədiyini bildirib. Vəkilin sözlərinə görə, bütün ittiham polislərin iddiaları üzərində qurulub.
Bu zaman Nağıyev Ramazanov həqiqətən narkotik vasitələrə malikdirsə, istintaqın bu vasitələrin mənbəyini müəyyən etmədiyinə diqqət çəkib.
“Rəşadın evində axtarış belə aparılmayıb”, deyə Nağıyev bildirib.
Bununla belə, hakim blogeri CM-in 234.4.3-cü (böyük miqdarda qanunsuz narkotik saxlamaq və satmaq) maddəsi ilə təqsirli bilərək, 9 il müddətinə azadlıqdan məhrum edib. Bu maddə üzrə maksimum cəza 12 il həbs cəzasıdır.
Prokuror Ramazanovun 10 il azadlıqdan məhrum edilməsini istəmişdi.
Bloger mayın 9-da metronun “20 yanvar” stansiyası yaxınlığında saxlanılıb. Polisin iddiasına görə, onun üzərində 9 qr heroin aşkar edilib. Lakin Ramazanov özü bu ittihamı təkzib edərək, siyasi motivlərlə üzərinə narkotik atıldığını bəyan edib. Bloger facebook-da Azərbaycan hakimiyyətinin ünvanına kəskin tənqidləri ilə məşhurdur.
Ağaaddin öz facebook səhifəsində (Rashad Heqiqet Ağaaddin) din, azadlıq və ədalət mövzularında statuslar və məqalələr yerləşdirirdi.
Xüsusən, o, İlham Əliyevin üçüncü dəfə prezidentliyə namizədliyinin irəli sürülməsi ilə bağlı istehza edərək, onun Ginnesin rekordlar kitabına daxil olmaq istədiyini qeyd edirdi.
O, Azərbaycan hakimiyyətini “şeytan Əliyev rejimi” adlandırır.
Maraqlıdır ki, həbsindən sonra o, qanuna zidd olaraq 10 gün ərzində DİN MCMBİ-də saxlanılıb və yalnız hüquq müdafiəçilərinin və mətbuatın müdaxiləsindən sonra Penitensiar Xidmətin istintaq təcridxanasına köçürülüb. -16B06-
-
- Siyasət
- 13 Noyabr 2013 17:21
Cəmiyyət
-
Ədalət Naminə Həmrəylik Komitəsinin təşəbbüsü ilə təşkil edilən, Azərbaycanda insan hüquqları vəziyyətinə həsr olunmuş vətəndaş cəmiyyəti fəallarının onlayn görüşündə jurnalistlərin, siyasi fəalların və müharibəyə qarşı çıxanların həbsi ilə bağlı ciddi narahatlıqlar vurğulandı. Avqustun 30-da keçirilən bu toplantı Beynəlxalq İtkin Düşənlərin Anım Günü ilə üst-üstə düşdü və Qarabağ müharibələrindən sonra həm Azərbaycan, həm də Ermənistan cəmiyyətlərinin qarşılaşdığı davamlı çətinlikləri diqqətə çatdırdı.
-
Sentyabrın 1-də Bakıda və Abşeron yarımadasında hava yağıntısız olacaq. Şimal-qərb küləyi gündüz cənub-şərq küləyi ilə əvəz olunacaq. Havanın temperaturu gecə müsbət 21+26, gündüz müsbət 33+38 dərəcə olacaq, Milli Hidrometeorologiya Xidməti bildirib.
-
Ölkənin aparıcı mobil operatoru "Milli və müasir" rəqəmsal muzeyini təqdim edir Azercell milli dəyərlərimizi müasir texnologiyalar vasitəsilə yaşatmaq, onları geniş auditoriyaya tanıtmaq və gələcək nəsillərə çatdırmaq məqsədilə "Milli və müasir" rəqəmsal muzeyi layihəsini təqdim edir. Bu innovativ təşəbbüs sənət və texnologiyanı birləşdirərək şirkətin hər iki sahəyə olan dəstəyini bir daha vurğulayır.
-
Bakının Suraxanı rayonu ərazisində sənaye zonasında bir obyektdə yanğın başlayıb. Yanğının söndürülməsinə FHN-in Dövlət Yanğından Mühafizə Xidmətinin qüvvələri cəlb olunub.
Rəy yaz