Bütün Avropada qeyri-adi istilər müşahidə olunur: İspaniyada 44 dərəcə, İsveçdə 30 dərəcədən yüksək

Bütün Avropa ərazisində qeyri-adi istilər müşahidə olunur, hakimiyyət və tibbi xidmətləri istilərin on minlərlə ölümə səbəb olduğu 2003-cü il faciəsinin təkrarlanmamasına müvəffəq olacaqlarına ümid edirlər.

İspaniya, Fransa, Portuqaliya, İtaliya, Belçika, İsveçrə, Böyük Britaniya və Hollandiyada termometr göstəricisi 40 dərəcəyə yaxınlaşıb. İsveç, Danimarka, Norveç və Finlandiyada 30 dərəcə isti var.

İtaliyanın meteorologiya xidməti bütün ölkə ərazisində 35-39 dərəcə proqnozlaşdırır. İnsanlar fəvvarələrdə, sərin kilsələrdə istilərdən qorunmağa çalışır.

İstilər ən çox İspaniyanın cənub regionlarına təsir edib. Termometr göstəricisi 44 dərəcə göstərir. Hakimiyyət artıq maksimum təhlükə səviyyəsi tətbiq edib.

Fransanın meteorologiya xidməti həftənin isti keçəcəyi haqqında xəbərdarlıq edib. Temperatur ölkənin cənub-qərbində 36-40 dərəcə arasında dəyişəcək. Parisdə 35-37 dərəcə, Lionda 41 dərəcə isti gözlənilir.

İstilərin meşə yanğınlarına səbəb olacağı gözlənilir. Bu cür yanğınlardan ən çox Portuqaliya və İspaniya əziyyət çəkir.

Hakimiyyət aşağıdakı tövsiyələri verir: “Özünüzü istiyə hazırlamalısınız. Çox su içmək, bayıra axşama doğru çıxmaq, işləri səhər tezdən görməyə çalışmaq və gündüz istisindən mümkün qədər qaçmaq lazımdır. Bunun üçün imkan daxilində evlərdən çıxmamaq və daha çox istirahət etməyə çalışmaq lazımdır”.

Havanın bu qədər isti olmasına sevinən təkcə şərabçılardır. Quru isti yay bol üzüm olacağını vəd edir ki, ondan da əla şərab əldə etmək olar. Həm də təkcə Fransa, İtaliya və İspaniya kimi ölkələrdə deyil, Almaniya, Avstriya və hətta son illər şərab istehsalına başlamış Böyük Britaniyada da. -02D-