Əfqan Sadıqov
Bakı/25.01.18/Turan: Yanvarın 24-də Cəlilabad rayon Məhkəməsində azel.tv saytının həbsdə olan təsisçisi və redaktoru Əfqan Sadıqovun yeni məhkəmə prosesi başlayıb. Xuliqanlıq ittihamı ilə həbs olunan jurnalisti bu dəfə Cəlilabad rayonunun İcra Hakimiyyətinin başçısı Əziz Əzizov böhtanda ittiham edir.
Xüsusi ittiham qaydasında şikayətə Cəlilabad Rayon Məhkəməsinin hakimi Qalib Paşayevin sədrliyi ilə baxılır.
Məhkəmə prosesi haqda AzadlıqRadiosuna məlumat verən jurnalistin vəkili Elçin Sadıqovun bildirdiyinə görə, şikayət gərəkli prosesual tələblərə cavab verməyib. Bu üzdən vəkil məhkəmədən xahiş edib ki, xüsusi ittiham qaydasında şikayətin icraata qəbul olunmasından imtina etsin.
"Xüsusi ittiham qaydasında şikayətin tarixi göstərilməlidir. Anca şikayətdə bu göstərilməmişdi. Eyni zamanda şikayət edən şəxs əməli kimin törətməsi - yazının müəllifinin kim olması barədə sübutlar təqdim etməlidir. Bunlar da məhkəməyə təqdim olunmamışdı", vəkil bildirib.
Müdafiə tərəfi həmçinin prosessual qanunvericiliyə istinad edərək, məhkəmə qarşısında xüsusi ittihamçının - icra başçısı Əziz Əzizovun şəxsən məhkəmədə iştirak etməsi barədə vəsatət qaldırıb. Vəsatət təmin edilməyib.
Məhkəmə yekunda şikayətin icraata götürülməsinə qərar verib.
Proses qeyri-müəyyən vaxta təxirə salınıb. E.Sadıqovun bildirdiyinə görə, Ə.Sadıqov 1 Saylı Bakı İstintaq Təcridxanasına etap olunacaq. Məhkəmənin davam etdiriləcəyi tarixin etap məsələsi həll edildikdən sonra açıqlanacağı gözlənilir.
Azel.tv saytının təsisçisi və redaktoru Əfqan Sadıqov 2016-cı il noyabrın 22-də saxlanılıb. O, icra hakimiyyətinin binasında bir qadını vurmaqda ittiham olunub. Sadıqov bunu təxribat adlandırıb.
2017-ci il yanvarın 12-də 127.2.3-cü (xuliqanlıq niyyəti ilə təhlükəli üsulla sağlamlığa qəsdən az ağır xəsarət yetirmə) maddə ilə mühakimə olunub. Ona 2 il 6 ay həbs cəzası verilib.
Amma noyabrın 7-də Ali Məhkəmə ittihamı 127.1-ci (sağlamlığa həyat üçün təhlükəli olmayan az ağır xəsarət yetirmə) maddəyə tövsif edib və həbs cəzasını 1 il yarıma endirib.
İndi, cəza müddətinin başa çatmasına üç ay qalmış onun həbs müddəti uzadıla bilər.
Hüquq müdafiə təşkilatları Əfqan Sadıqovu siyasi məhbuslar siyahısına daxil ediblər. Yerli hüquq müdafiəçiləri jurnalistin rayonda hüquq pozuntuları barəsində tənqidi məqalələrinə görə, həbs edildiyini hesab edirlər.
Ancaq bu deyilənlərə, hələlik, Cəlilabad rayon İcra Hakimiyyətinin başçısının münasibətini almaq mümkün olmayıb.
Üstəlik, Azərbaycan hakimiyyəti rəsmiləri ölkədə siyasi məhbus olması fikri ilə razılaşmırlar. Onlar deyirlər ki, Azərbaycanda düşüncələrinə, siyasi mənsubiyyətinə görə heç kim həbs edilmir.--0--
Cəmiyyət
-
Dekabrın 22-də Bakıda və Abşeron yarımadasında havanın dəyişkən buludlu olacağı, arabir tutulacağı, əsasən yağıntısız keçəcəyi gözlənilir. Lakin gecə və səhər bəzi yerlərdə çiskin olacağı ehtimalı var. Mülayim cənub-qərb küləyi əsəcək.
-
Çox vaxt "Qafqazın Dubayı" adlandırılan Bakı getdikcə sakinlərin mənzil hüquqlarının sistematik şəkildə pozulması ilə tanınmağa başlayır. Şəhərin yenilənməsi və yeni eleqant binaların inşası zamanı Azərbaycanın paytaxtında minlərlə ailə qanunsuz olaraq öz evlərindən məhrum edilib. Çoxları müqavimətin faydasız olduğunu bilərək, öz qiymətli əmlaklarına görə qeyri-adekvat pul kompensasiyasına razılaşır. Mənzil Məcəlləsinə inanan azlıq isə tikinti şirkətlərindən ədalətli təzminat tələb edir, ancaq çox vaxt hər şeyi itirir - həm evini, həm də təzminatın istənilən formasını.
-
Düşərgədə iştirak edən məktəblilər ölkəmizi üç nüfuzlu beynəlxalq olimpiadada təmsil edəcək Ölkəmizin beynəlxalq fənn olimpiadalarında təmsil etməyə hazırlaşan şagirdlərin hazırlıq prosesi müvəffəqiyyətlə davam edir. Azercell, Elm və Təhsil Nazirliyi və Təhsil İnstitutunun birgə əməkdaşlığı çərçivəsində Bakı Ali Neft Məktəbində bu məktəblilər üçün növbəti “İnformatika Düşərgəsi” təşkil olunub.
-
Ötən gecə Azərbaycan-Ermənistan sərhədində 4.8, 3 və 3.8 maqnitudalı zəlzələlər baş verib, Azərbaycan Milli Elmlər Akademiyası Respublika Seysmoloji Xidmət Mərkəzi bildirib.
Rəy yaz