Çingiz Abdullayev: Heç kim Pen-klubların fikrinə qarşı çıxa bilməz

İranda həbs edilən Azərbaycan şairləri Fərid Hüseyn və Şəhriyar Hacızadənin hüquqlarını müdafiə komitəsi onların taleyinə aydınlıq gətirilməsi üçün addımlar atmaq niyyətindədir. 

     Dünən Azərbaycan pen-klubunun rəhbəri, yazıçı Çingiz Abdullayev dünya pen-klubları və hüquq müdafiəsi təşkilatlarını gənc şairlərin həbsini pisləməyə və onların azadlığa buraxılmasını tələb etməyə çağırıb. Bu müraciətə artıq dəstək verilir. 

    Çingiz Abdullayev Turan-ın müxbiri ilə söhbətində deyib ki, Rusiya, Türkiyə, Fransa, Çexiya pen-klubları Azərbaycan şairlərinin müdafiəsinə qalxıb.

    Komitə bu yaxınlarda Azərbaycan vətəndaşlarının hüquqlarını qorumaq üzrə tədbir görülməsi üçün İran prezidentinə müraciıət edəcək. 

    Bundan başqa, yaxın günlərdə vəkillər də daxil, 2-3 nəfərdən ibarət xüsusi missiya İrana göndəriləcək. 

    Abdullayev hesab edir ki, Azərbaycan şairlərinin hüquqları kobud şəkildə pozulub. «Mən hüquqşünas, beynəlxalq hüquq üzrə mütəxəssisəm. Xarici vətəndaş saxlanılandan sonra 24 saat ərzində onun ölkəsinin konsulluğuna xəbər verilməlidir. Hələ vəkillə təminatı demirəm», - deyə Abdullayev bildirib. 

   Bundan başqa, təkcə insan haqları yox, diplomatik xidmət haqqında Vyana konvensiyasının müddəaları da pozulub. Azərbaycan konsul xidmətinin həbs edilənlərin taleyi barədə 5 müraciətinə cavab verilməyib, həbsin səbəbi barədə rəsmi informasiya yoxdur.

   Abdullayev hesab edir ki, İran bu ölkədən neft alınmasına qadağa üzrə Aİ sanksiyaları ilə üzləşdiyi bir vaxtda əlavə beynəlxalq sanksiyalar nəyə lazımdır.

 «Bunu istəməzdik. İran qonşu ölkədir və onun xalqına pis heç nə arzu etmirik. Biz vətəndaşlarımızın hüquqlarına İran qanunları və beynəlxalq konvensiyalara uyğun əməl edilməsini tələb edirik. Üstəlik, Azərbaycan şairləri ora dəvət edilib», - deyə Abdullayev bildirib.

   “Pen-klubların beynəlxalq cəmiyyətinin işə qarışması nə dərəcədə kömək edə bilər?” sualına cavab olaraq Abdullayev deyib ki, hələ elə bir hal olmayıb ki, pen-klubların müraciəti nəticə verməsin. 

   «Bu, nüfuzlu strukturdur. Oraya bütün Nobel mükafatları laureatları, kral sülaləsi üzvləri, kübar ailələr daxildir və hələ heç bir qanlı rejim belə pen-klubların fikrinə qarşı çıxa bilməyib », - deyə Abdullayev bildirib.

    Azərbaycan Yazıçılar Birliyinin sədri Anar isə öz növbəsində İranın ali dini lideri Xameneiyə müraciət edərək onu Azərbaycan şairlərinin azad edilməsi üçün öz nüfuzundan istifadə etməyə çağırıb. 

   Xatırladaq ki, şairlər 2 mayda Təbrizdə həbs olunublar və rəsmi olmayan məlumata görə, casusluq və narkotik ticarətində ittiham edilirlər. —06B--