D18 fəalı Qadir Ağakişiyev döyülüb

Fevralın 20-də həbs edilərək Sumqayıt Şəhər Məhkəməsinin qərarı ilə 30 sutka inzibati həbs cəzası alan D18 Hərəkatının üzvü Qadir Ağakişiyev polislər tərəfindən döyülüb. Bu barədə  D18 Hərəkatının üzvü, hüquq müdafiəçisi  Samira Ağayeva Facebook səhifəsində yazıb. O  qeyd edib ki, Qadir Ağakişiyev bu gun bu barədə vəkil Fariz Namazlıya danışıb. 

“Fariz Namazlı bildirir ki, Sumqayıt İcra Hakimiyyətindən Qadir Ağakişiyevə zəng ediblər ki, Sumqayıt Şəhər İcra Hakimiyyətinə gəl, qaldığınız yataqxana plana düşüb. O da gedib. Orada 4 nəfər mülki geyimli şəxs onu tutub Sumqayıt Şəhər Polis İdarəsinə aparıb. Polis İdarəsində 5-6 nəfər Qadir Ağakişiyevi şillə, təpik, yumruqla döyüb, ayaqlarına və böyrəklərinə zərbələr endirərək guya küçədə gedərkən ucadan söyüş söydüyü, polisin qanuni tələbinə məhəl qoymadığı məzmunlu izahata qol çəkməyə məcbur ediblər. O da məcburən çəkib. Daha sonra onu Sumqayıt şəhər 3-cü polis bölməsinə aparıblar. Orada Qadir Ağakişiyevə qarşı təzyiqlər olmayıb. Onu bir neçə kağıza imza atdırıb daha sonra məhkəməyə aparıblar və 30 gün müddətinə inzibati həbs veriblər. O, məhkəmədə döyüldüyünü və hər hansı inzibati xətaya yol vermədiyini bildirsə də məhkəmə buna məhəl qoymayıb”, - məlumatda deyilir.

S.Ağayeva qeyd edib ki,  Hərəkat üzvünü döyülmə nəticəsində topuğu şişib, ayağında kapilyar damarları partlayıb, böyrəkləri aldığı zərbələrə görə ağrıyır.

“Ombudsmanın nümayəndələri ötən həftə Sumqayıt Şəhər Polis İdarəsində olarkən kamerada ayaqüstü söhbət ediblər, onlara da döyülməsi barədə məlumat versə də heç bir müsbət nəticə yoxdur”, - o bildirib.
Öz növbəsində F.Namazlı Turan-a bildirib ki, Q.Ağakişiyev hazırda Sumqayıt Şəhər Polis İdarəsinin müvəqqəti saxlama yerində saxlanılır.

Vəkil Q. Ağakişiyevin döyülməsi ilə bağlı ombudsmana və işgəncələrin araşdırılması üçün prokurorluğa şikayət veriləcəyini deyib.

Məsələ ilə bağlı hüquq- mühafizə orqanlarından şərh almaq mümkün olmayıb -16D