Daşkəsən rayonunun Xoşbulaq kəndinin problemləri və yerli hakimiyyətin münasibəti

Bakı/12.06.23/Turan: Daşkəsən rayonunun Xoşbulaq kəndinin (Bakıdan 460 kilometr qərb) bir qrup sakini ilə yerli icra orqanları arasında yaranmış problem hələ həllini tapmayıb. Kənd sakinləri yerli hakimiyyətin fəaliyyətini sosial şəbəklərdə tənqid etdikdən sonra tənqidçilərdən biri Anar Süleymanov 30 sutka inzibati həbsə məhkum edilib.

https://www.facebook.com/100050815643074/videos/112483541867469/

Kənd sakinləri torpaqların kənd sakinlərinin deyil, vəzifəli şəxslərin istifadəsinə verilməsində yerli hakimiyyət orqanlarını günahlandırır.

Bu gün, iyunun 12-də polis əməkdaşları digər təqnidçi Sahib Məmmədzadəni rayon polis şöbəsinə dəvət edib. https://www.facebook.com/azadliqqazeti/videos/770764101195870

“Səhər saat 7:00-da dörd nəfər polis əməkdaşı evimizin həyətinə gəlib rayon polis şöbəsinə getməyimi istədilər. Mən getmədim. Bundan sonra barəmdə olan inzibati xəta ilə əlaqədar polis şöbəsinə getməyim barədə rayon polis şöbəsinin rəis müavini Vüsal Qurbanovun imzası olan  məktubu mənə təqdim etdilər”, - Sahib Məmmədzadə "Amerikanın səsi"nə deyib.

Həmçinin Sahib Məmmədzadə  Daşkəsən rayon polis şöbəsinin rəis müavini Vüsal Qurbanovun imzası ilə ona təqdim edilən məktubun fotosunu və polis əməkdaşlarının onun evinin qarşısına gələrək Məmmədzadəni polis şöbəsinə dəvət etmələri haqda videonu "Amerikanın səsi"nə təqdim edib.

Bununla yanaşı Daxili İşlər Nazirliyinin mətbuat xidmətindən "Amerikanın səsi"nə bildiriblər ki, Daşkəsən rayon polis şöbəsində Sahib Məmmədzadə ilə bağlı hər hansı icraat aparılmır.    

Sahib Məmmədzadənin polisə dəvət edilməsi onun kəndin ərazisindəki torpaqların kənd sakinlərinin deyil, yüksək vəzifəli məmurların və onların qohumlarının istifadəsinə verilməsini, həmçinin yerli icra hakimyətinin fəaliyyətini sosial şəbəkələrdə tənqid etdikdən bir neçə gün sonraya təsadüf edir. https://www.facebook.com/azadliqqazeti/videos/284369350768360

Sahib Məmmədzadənin tənqidi fikirlərilə bağlı Daşkəsən Rayon İcra Hakimiyyətindən şərh almaq mümkün olmayıb. Belə ki, Daşkəsən Rayon İcra Hakimiyyətinin rəsmi saytındakı əlaqə telefonuna binanı mühafizə edən polis əməkdaşı cavab verib. İcra Hakimiyyətinin qəbul şöbəsindən isə adını açıqlamayan şəxs "Amerikanın səsi"nə bildirib ki, onun suala cavab vermək səlahiyyəti yoxdur, digər məsul şəxsin telefonunu öyrənib deyəcək və bir daha telefona cavab verməyib.

Xatırladaq ki¸ Daşkəsən rayon Xoşbulaq bələdiyyəsilə bağlı problemlər bundan öncə də diqqət mərkəzində olub.

Belə ki, 2021-ci ilin fevralında Daşkəsən rayon Xoşbulaq bələdiyyəsinin sədri vəzifəsində işləmiş Rasim Allahverdiyev, ləğv olunmuş Dövlət Torpaq və Xəritəçəkmə Komitəsinin Daşkəsən rayon şöbəsinin müdiri Şahbaz Mehdiyev və həmin şöbənin mütəxəssisi Vüqar Məmmədovun xidməti vəzifələrinin icrası zamanı qanun pozuntularına yol vermələri faktı ilə bağlı baş prokuror yanında Korrupsiyaya qarşı Mübarizə Baş İdarəsində cinayət işi açılıb.

Aparılmış istintaq-əməliyyat tədbirlərilə Rasim Allahverdiyevin Şahbaz Mehdiyev və Vüqar Məmmədov ilə qabaqcadan əlbir olaraq Daşkəsən rayonu Xoşbulaq kəndi ərazisində yerləşən dövlət mülkiyyətində olan torpaq sahəsini müvafiq qanunvericiliyin tələblərini pozaraq köhnə tarixə saxta sənədlərin tərtib edilməsi yolu ilə ayrı-ayrı şəxslərə satılması müqabilində vətəndaşlardan ümumilikdə 25 min 400 manat pul vəsaitini rüşvət qismində alaraq öz aralarında bölüb şəxsi ehtiyaclarına sərf etməsinə əsaslı şübhələr müəyyən edilib.

Həmin şəxslərə qarşı Cinayət Məcəlləsinin külli miqdarda rüşvət almaq, vəzifə saxtakarlığı və digər maddələrilə ittiham irəli sürülüb.0