Deputatlar Laçın yolunda cinayətlərdə ittiham olunan şəxsləri saxlamağı zəruri hesab edirlər

Bakı/21.12.22/Turan: Laçın dəhlizində aksiya keçirən Azərbaycanın vətəndaş cəmiyyəti fəallarının arasından mülki yük daşıyan avtomobillər, təcili yardım maşınları hərəkət edir. Amma faktiki olaraq Qarabağın Rusiyanın nəzarəti altında olan hissəsinin rəhbərliyi azərbaycanlılar Laçın yolunda dayandığı müddətcə bu dəhlizdən keçməkdən imtina etdiklərini bildirib.

Ruben Vardanyan bəyanat yayıb: "Mühasirə davam edir. Baxmayaraq ki, bilirsiniz, yolun guya açıq olduğu haqqında söhbətlər var, amma belə deyil. Onlar yolun kənarındadırlar, istədikləri vaxt maşınları saxlaya bilirlər. Buna görə biz deyirik ki, bu, qəbuledilməzdir. Azərbaycanlılar oradan tamamilə getməlidirlər".

Turan-ın suallarını cavablandıran Milli Məclisin deputatları Qarabağ ermənilərinin rəhbərliyinin bu davranışını həbs edilmək qorxusu adlandırırlar.

"Qarabağın Azərbaycan qanunvericiliyi ilə problemi olmayan sakinləri heç nədən qorxmamalıdırlar. Onlar üçün yol açıqdır. Azərbaycana qarşı cinayətlərə görə barələrində cinayət işi açılanlar isə bizim hüquq-mühafizə qüvvələrimizin fəaliyyət göstərdiyi bölgədə görünən kimi saxlanılacaqlar", deyə deputat Rüfət Quliyev Turan-a bildirib.

Deputat Məlahət Həsənova Turan-ın sualına cavabda təəcübünü belə ifadə edib: "Cinayətkarlar niyə saxlanılmasın? Gəncəyə raket zərbələri endirən komandir Araik Arutyunyan cəzalandırılmalıdır, ona qarşı hərbi cinayətlərə görə cinayət işi açılıb. Bütün cinayətkarlar Azərbaycan məhkəməsi qarşısında cavab verəcəklər. Yaxşı olardı ki, Araik özü Azərbaycan məhkəməsinə təslim olsun. Erməni əsilli günahsız vətəndaşlar isə özlərini təhlükəsiz hiss edə bilərlər, onlar Azərbaycan pasportu və ölkə ərazisində hərəkət etmək hüququ almalıdırlar".

Deputat Əziz Ələkbərli Azərbaycanlı fəalların aksiyasında görünən cinayətkarların saxlanılması üçün maneə görmür. "ATƏT, AŞ və digər beynəlxalq təşkilatlar Bakıdan cinayətkarları cəzadan azad etməyi tələb etmir. Hərbi və dövlət cinayətləri törədənlər tutduqları vəzifədən asılı olmayaraq saxlanılmalı və mühakimə edilməlidir. Azərbaycan əsilli vətəndaşlar cəzalandırılır, eyni qanuni tədbirlər ermənilərə də aiddir, Qarabağ sakinləri üçün istisna yoxdur. Regionun dinc, qanuna riayət edən sakinləri isə Azərbaycan Respublikasının qanunları çərçivəsində yaşaya bilərlər".

Deputat Arzu Nağıyev Turan-la söhbətində erməni əsilli bir neçə şəxsin cinayətlərdə ittiham olunduğunu, onların adlarının barələrində beynəlxalq axtarış elan edilmiş şəxslər siyahısına daxil edildiyini xatırladıb.

"Ruben Vardanyan Rusiya sülhməramlıları hesabına öz təhlükəsizliyini təmin etmək istəyir, buna görə Laçın dəhlizində vəziyyətin Azərbaycan fəalları oraya gəlməzdən əvvəl mövcud olan formata qaytarılmasını tələb edir. Bu, olmayacaq. Azərbaycan Vardanyanın ona tapşırılmış missiyanı həyata keçirməsinə imkan verməyəcək. Laçın dəhlizi cinayətkarlar və qanunsuz yüklər üçün birdəfəlik bağlanıb", deyə Nağıyev bildirib.

Baş Prokurorluq Azərbaycan Respublikasının Cinayət Məcəlləsinin 100.2 (təcavüzkar müharibə aparma), 120.2.1 (bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən adam öldürmə), 279.3 (Qanunvericiliklə nəzərdə tutulmayan silahlı birləşmələri və ya qrupları yaratma), 318.2 (Azərbaycan Respublikasının dövlət sərhədini qanunsuz olaraq keçmə) və digər maddələri ilə bir neçə cinayət işi açıb. İş üzrə istintaqın aparılması Baş Prokurorluğun İstintaq İdarəsinə həvalə edilib.

Baş prokuror Kamran Əliyevin bildirdiyinə görə, Azərbaycanın istintaq orqanları özünü "DQR"in "prezidenti" elan etmiş Ermənistan nümayəndəsi Araik Arutyunyana, onun köməkçisi David Babayana, qondarma rejimin "müdafiə naziri" Calal Arutyunyana və deputat Armen Babacanyana qarşı cinayət işləri açıb. Onlar hərbi cinayətlər törətməkdə ittiham olunurlar, onların istintaqa cəlb edilməsi haqqında qərar qəbul edilib. Bu şəxslərin həbsinə qərar verilib, İnterpola onların həbsi və istintaqa cəlb edilməsi haqqında məlumat verilib.