DİN dini ekstremist cinayətkar dəstəni ifşa etdiyini bildirir

Hüquq-mühafizə orqanları cinayətkarlıqla mübarizə sahəsində Tərtər rayonunda növbəti xüsusi əməliyyat tədbiri həyata keçiriblər. Bu haqda Daxili İşlər Nazirliyindən bildirilib.

DİN-ə müraciət edən Tərtər rayon sakini yetkinlik yaşına çatmayan oğlunun radikal dini cərəyana cəlb olunmaqla Suriyaya göndərilməsi və orada qanunsuz silahlı birləşmələrin tərkibində döyüşlərdə iştirak etməsi haqda DİN-ə müraciət edib. Araşdırmalar nəticəsində Tərtər ərazisində ayrı-ayrı vətəndaşların ölkə hüdudlarından kənarda qanunsuz fəaliyyət göstərən silahlı birləşmələrin sıralarına qoşulmasını təşkil edən ekstremist yönümlü mütəşəkkil cinayətkar dəstə müəyyən edilib.

Nazirliyin xüsusi təyinatlı polis qüvvələri də cəlb olunmaqla, Baş Mütəşəkkil Cinayətkarlığa qarşı Mübarizə İdarəsi, Tərtər Rayon Polis Şöbəsi və prokurorluğu əməkdaşları dəstənin 4 üzvünü Zülfüqar İbrahimovu, Mübariz Mirzəliyevi, Şəmsəddin Abdullazadə və Vüqar Əliyevi saxlayıblar. Onların yaşadıqları mənzillərə baxış zamanı 2 ədəd sandıqçası ilə birlikdə 1 avtomat, 800 qram partlayıcı maddə, 9 əl qumbarası, 170 ədəd patron, yayılması qanunla qadağan olunmuş xeyli sayda dini ədəbiyyat, disklər və s. maddi sübutlar götürülüb.

Faktla bağlı cinayət işi başlanılıb, istintaq aparılır.

Hazırda mütəşəkkil dəstənin cinayətkar əlaqələrinin ifşası, habelə, digər üzvlərinin müəyyən olunaraq məsuliyyətə cəlb edilməsi istiqamətində təxirəsalınmaz istintaq və əməliyyat tədbirləri davam etdirilir. -05D-