Dindarlar Hacı Cavad məscidini müdafiə ediblər (yenilənib)

Bakı/12.04.17/Turan: Polisin məsciddən və ona bitişik ərazidən uzaqlaşdırmaq cəhdlərinə baxmayaraq, 200-ə yaxın dindar Hacı Cavad məscidinin sökülməsinə yon verməyib.

Günortadan sonra polis və yerli hakimiyyət nümayəndələri bu zonanı tərk ediblər, dindarlar isə nümayişkaranə şəkildə məscidin içində deyil, küçədə namaz qılıblar.

Xatırladaq ki, bu bina klassik məscid formasında deyil – o, kub şəklindədir və minarəsi yoxdur.

Daxili məkanın ölçüləri böyük deyil - 12x18 metr. Tavan yüksəkliyi 6 metrdir. Məscid icmasının sözlərinə görə, bina tacir Hacı Cavad tərəfindən tikilib və 19-cu əsrə aiddir.

Qafqaz Müsəlmanları İdarəsinin sədri jurnalistlərə bildirib ki, məscidin söküntüsü o məscidin camaatı ilə razılaşdırılmalıdır. Söküntü ərazinin abadlaşdrılması məqsədilə həyata keçirilirsə, bu söküntüyə bəraət verilə bilər.

Qeyd edək ki, ötən gecə inşaatçılar söküntü zonasında yerləşən 19-cu əsrə aid istifadə olunmayan daha bir kiçik məscidi söküblər. Buna görə dindarlar hakimiyyətin məscidi dindarların az olacağı və ciddi müqavimət göstərə bilməyəcəyi gecə saatlarında sökə biləcəyindən ehtiyatlanırlar. -02/05В-

*   *   *

2017 Aprel 12 (Çərşənbə) 13:34:02

Məscidin sökülməsi ilə əlaqədar dindarların polislə qarşıdurması

Bakı/12.04.17/Turan: Çərşənbə günü səhər saatlarından keçmiş Sovetski küçəsi ərazisində polis və “Hacı Cavad” məscidinin binasını boşaltmaqdan imtina edən bir qrup dindar arasında qarşıdurma yaranıb.

Bina şəhər infrastrukturunun genişmiqyaslı yenidənqurması və yeni yolların tikintisi gedən zonada yerləşir. Plana əsasən, memarlıq əhəmiyyəti olmayan bu bina sökülməlidir.

Amma dindarlar dairəvi müdafiə xətti təşkil edərək, getməkdən imtina edir, məscidi sökməməyi tələb edirlər.

Qafqaz Müsəlmanları İdarəsi vəziyyətlə bağlı şərh vermir. Öz növbəsində, icra hakimiyyəti bildirir ki, söküntü planları haqqında dindarlara çoxdan xəbərdarlıq edib və bu qərarın alternativi yoxdur.

Qarşıdurma zamanı binanı müdafiə edən ona yaxın şəxs polis tərəfindən saxlanılıb.

Hələlik hakimiyyət qətiyyətli addımlar atmır, amma dindarlar da təslim olmurlar. -02В-