Dini fəal 7 il müddətinə azadlıqdan məhrum edilib

Bakı/27.02.18/Turan: Çərşənbə axşamı Bakı Ağır Cinayətlər Məhkəməsində narkotik maddələrin qanunsuz dövriyyəsində ittiham olunan "Müsəlman Birliyi" hərəkatının fəalı Əhsən Nuruzadənin işi üzrə proses yekunlaşıb.

Məhkəmə onu 7 il müddətinə azadlıqdan məhrum edib. Prokuror onun 8 il müddətinə həbs edilməsini istəmişdi.

Hökm oxunmazdan əvvəl Nuruzadə son sözlə çıxış edib, ittihamları təkzib edərək, həbsinin əsl səbəbinin "Müsəlman Birliyi" hərəkatının lideri Taleh Bağırzadənin hüquqlarını müdafiə etməsi, habelə Nardaran hadisələri ilə bağlı həbs olunmuş onlarla insana maddi və mənəvi dəstəyi olduğunu bildirib.

Müdafiə tərəfi hökmdən apellyasiya şikayəti verəcək.

Xatırladaq ki, Nuruzadə 6 oktyabr 2017-ci il tarixində narkotik maddələrin qanunsuz dövriyyəsi ittihamı ilə həbs edilib. Ona qarşı 234.4.3-cü (böyük ölçüdə narkotik maddələrin qanunsuz dövriyyəsi) maddəsi ilə ittiham irəli sürülüb. Bu maddə 5 ildən 12 ilədək azadlıqdan məhrumetmə cəzası nəzərdə tutur.

Nuruzadə 2015-ci ildə Nardaran hadisələri ilə əlaqədar həbs edilmiş dini fəalların hüquqi və ictimai müdafiəsinin əlaqələndirilməsi ilə məşğul olurdu. O, yerli hüquq müdafiəçiləri tərəfindən siyasi məhbus kimi tanınıb. -16B-