Dini kəsim təmsilçiləri R.Mehdiyevin dini tənqid etməsinə cavab verdilər

Bu günlərdə Dövlət İdarəçilik Akademiyasındakı (DİA) tədbirdə Prezident Administrasiyasının (PA) rəhbəri Ramiz Mehdiyevin iqtidarın, eləcə də cəmiyyətin bəzi qruplarının ünvanına tənqidi çıxışı diqqət mərkəzindədir.

“Turan”ın müxbirilə söhbətdə dini kəsimin təmsilçiləri bu çıxışın dinə aid hissəsində R.Mehdiyevin ritorikasını bütünlükdə dini kəsimə qarşı baş verə biləcək hansısa hücumun anonsu kimi dəyərləndiriblər.

R.Mehdiyevin ölkədə hicablı xanımların sayının artmasını tənqid etməsi bəyənilməyib. Belə ki, dini kəsim təmsilçiləri hicabın “Quran-i-Kərim”in əmri olmasını xatırladıblar. Daha sonra Azərbaycan dövləti müstəqillik əldə etdikdən sonra dini eitqad azadlıqlarının ölkə Konstitusiyasnda əks edilidiyini deyiblər. Dini azadlıqların insanın təməl azadlıqları sırasına daxil olduğu vurğulanıb. Onların firkrincə, bu çıxışı ilə R.Mehdiyev insan azadlıqlarının və o cümlədən, dini azadlıqların əleyhinə mövqe sərgiləyib. Bu mövqe Konstitusiya tələbinə saymamazlıq kimi dəyərləndirilib. Digər tərəfdən isə dindarlar insanın geyiminin öz zövqünə uyğunluğu kimi şəxsi məsələ olmasına da diqqət çəkiblər. Hicablı xanımların sayının artmasına görə PA rəhbərinin ailədaxili mühiti tənqid etməsini dini kəsim təmsilçiləri hər ailənin özünə aid ailədaxili məsələyə kənar müdaxilə kimi qiymətləndiriblər.

PA rəhbərinin qızların erkən yaşlarda ərə verilməsinə görə dini günahkar sayması da etirazla qarşılanıb. Dindarlar Azərbaycan qanunlarında erkən nikaha görə cəzalar nəzərdə tutulduğu üçün qanunn qüvvəsindən istifadə etməyi təklif ediblər. Buna görə dinin bostanına daş atmağın yersiz olduğunu deyiblər.

PA rəhbərinin ölkənin savadsızlığa, möhvumata və aqressiv dindarlığa sürüklənməsi haqda fikirləri və ölkədə savadsızlığa görə dolayı yolla dini tənqid etməsi də cavabsız qalmayıb. Bu kəsimin təmsilçiləri Azərbaycanda mədrəsələrin uzun əsrlər boyu yeganə elm və tədris mənbəyi olduğunu yada salıblar. İslam dininin elmli, savadlı olmağa daim üstünlük verdiyi vurğulanıb. “Quran-i-Kərim”də elmin vacibliyi ilə bağlı 500-dən yuxarı ayə olduğu qeyd olunub. İndiki halda PA rəhbərinin savadsızlığa görə günahı dində yox, təhsilin vəziyyətində axtarmasını tövsiyə ediblər.

Dini kəsim təmsilçiləri Azərbaycanda dini fundamentalizm olmadığını, amma radikal dini cərəyanların olduğunu söyləyiblər. Vəhabi cərəyanı Azərbaycana ayaq açandan ölkədə dini radikallıq yaşandığı yada salınıb. Vəhabi cərəyanı ardıcıllarına bina tikməyə razılıq verilməsinə, radikal baxışlarını rahat yaymalarına görə hakimiyyəti tənqid ediblər. Eyni zamanda Azərbaycan vətəndaşı olan bir qrup şəxsin Suriyada terrorçu dəstələrin tərkibində döyüşməsi məsələsinə də cavab verilib. Dini kəsim təmsilçiləri bu məsələdə maarifləndrimə işinin zəif olduğunu bildiriblər. Onlar belə radikal cərəyanların ölkədə varlığına son qoymağın yolunun ciddi maarifləndirmədən keçdiyini bəyan ediblər. Bunun üçün gündəlik teleefir lazım olduğu qeyd edilib. İqtidarın isə din xadimlərinə belə şərait yaratmadığı səsləndirilib. -05B-