Dövlət Komissiyası Qarabağ müharibəsi zamanı itkin düşmüş 25 nəfərin taleyinə aydınlıq gətirib

Azərbaycanın Əsir və itkin düşmüş, girov götürülmüş vətəndaşlarla əlaqədar Dövlət Komissiyasının işçi qrupu 25 nəfərin taleyinə aydınlıq gətirib.

Beləliklə, 1 noyabr 2014-cü ilə olan məlumata görə, Ermənistan-Azərbaycan münaqişəsi nəticəsində itkin düşənlərin sayı 4016 nəfər təşkil edib.

4016 nəfər itkin düşmüş şəxsin 3256 nəfəri hərbiçi, 758 nəfəri mülki şəxslərdir, 2 nəfərin hərbiçi və ya mülki şəxs olduğu məlum deyil.

Mülki şəxslər arasında 59 nəfəri itkin düşərkən yetkinlik yaşına çatmamış uşaq (17 nəfər azyaşlı qız), 254 nəfər qadın, 351 nəfər yaşlı şəxsdir (154 nəfər qadın).

Münaqişə müddətində 1419 nəfər əsir və girovluqdan azad edilib. Onlardan 347 nəfər qadın, 1072 nəfər kişidir. Eyni zamanda 207 nəfər uşaq (73 nəfər azyaşlı qız), 287 nəfər yaşlı şəxsdir (110 nəfər yaşlı qadın). 

Dövlət Komissiyasına daxil olmuş materialların təhlili zamanı 554 nəfərin əsir və girovluqda qətlə yetirildiyi və ya müxtəlif səbəblrdən vəfat etdiyi müəyyən edilib. Onlardan 104 nəfər qadın, 449 nəfər kişidir. 137 nəfərin yalnız adı məlumdur, 75 nəfər isə naməlum şəxslərdir. 

Qeyri-rəsmi məlumatlara görə, itkin düşənlərin bir hissəsi (hərbiçilər) ermənilərin nəzarəti altında olan ərazilərdə münaqişə zonasında dəfn edilib. -06D-