Dövlət Sosial Müdafiə Fondu (DSMF) pensiya artımları sahəsində indeksasiya metoduna keçib

Bu barədə DSMF-nin sədri Himalay Məmişov mətbuat konfransında çıxışında deyib.

Onun sözlərinə görə, hər il indeksləşdirmə əsasında pensiya artımı olacaq. Bu artım bütün növ pensiyalara şamil olunacaq.

DSMF sədri bildirib ki, indeksləşmə yanvar ayının 1-dən hesablanacaq və bu indeksasiya metodu ilə olan artım fevral ayının pensiyalarına şamil olunacaq. Bu il 10,8 faizlik indeksləşdirmə proqnoz olunur.

Ekspertlər isə hesab edir ki, mövcud reallıqlar fonunda pensiyaların 10,8 faizlik artımı azdır. 

Milli Məclisin Əmək və sosial siyasət komirəsinin üzvü Arzu Nağıyev Turana bildirib ki, pensiya infilyasiya faizi qədər deyil, əmək haqqı artımı qədər indeksləşdirilir: "Hazırda həmin göstərici dəqiq bilinmir, ancaq fevralın ilk 10 günündə onun nə qədər olduğu məlum olacaqdır. Ona görə, hazırda pensiya artımının az və ya çox olmasını demək mümkün deyil".

Deputat qeyd edib ki, pensiyaların indeksləşdirilməsi pensiya məbləğlərinin kəskin artırılma metodu deyil, indeksasiyanın əsas məqsədi pensiyaların, dəyər itgisindən qorunmasıdır, daha doğrusu onun əvvəlki ildəki real dəyərini saxlamaqdır: "Digər tərəfdən, qeyd etmək istərdim ki, son 3-4 il ərzində pensiyalar təxminən 50 faiz artıb, minimum pensiya son 5 ildə 2.5 dəfə artırılıb. Bunlar pensiyaçıların sosial müdafiəsini artırmaq üçün nəzərdə tutulub".

İqtisadçı Natiq Cəfərli isə Turana bildirib ki, pensiyalar orta aylıq əmək haqqının artım tempinə uyğun indeksləşdirilir: "Bizdə təqaüdlərin məbləği o qədər aşağıdır ki, hətta 20 faiz artım olsa belə bu, o qədər də təsir göstərməz. Yəni, əsas problem indeksləşmə deyil, əsas problem odur ki, təqaüdlərin məbləği çox aşağıdır". 

Ekspertin sözlərinə görə, Azərbaycanda median təqaüd 400 manat civarındadır: "Bu, həddindən artıq aşağı göstəricidir. Buna görə də bizdə minimum və orta aylıq təqaüd artırmalıdır ki, indeksləşmədə bu özünü göstərsin".