D.Uolter: Dostluq üçün dua edək

ABŞ-ın Los-Ancelos şəhərində fəaliyyət göstərən “Sinay Məbədi” yəhudi dini icamsının Bakıda səfərdə olan üzvlərilə cərşənbə axşamı Qafqaz Müsəlmanları İdarəsində (QMİ) görüş keçirilib.

QMİ sədri, Şeyxüilsam Allahşükür Paşazadə qonaqları salamlayıb və bütün dinlərə aid insanları birləşdirən dəyərlər olduğunu vurğulayıb. A.Paşazadə “hamımızı xəlq edən Allah birdir” fəlsəfəsini bütün insanların birləşmə nöqtəsi adlandırıb. QMİ sədri Azərbaycanda tolerantlığın söz yox, gerçəklik olduğunu deyərək, bu sahədə Azərbaycanın dünyaya nümunə ola bilməsini xüsusi vurğulayıb.

O, ölkədə bütün dini konfessiyaların fəaliyyətinə bərabər şərait yaradıldığını, ölkədə yeni məscidlərlə yanaşı, sinaqoq və kilsələr tikildiyini qeyd edib. A.Paşazadə islam universiteti tələbələrinin görüşə toplanmasını gənclərə tolerantlığın hələ gənc yaşlarından öyrədilməsilə izah edib. “Biz dost olmaq istəyirik, amma bizimlə dostluq çətindir, dosta çox şey veərər, çox şey də tələb edərik”, - deyə QMİ sədri dini icma başçısına müraciət edib.

Daha sonra QMİ sədri Misirə aid Sinay yarımadasında Rusiyaya məxsus təyyarənin bu günlərdə qəzaya uğraması nəticəsində həlak olan insanların xatirəsini yad etməyi təklif edib. “Hər kəs, ayaq üstə, öz dininin buyurduğu dildə dua oxusun”, deyə A.Paşazadə təklif edib. Bu, QMİ-də tətbiq edilən bir ilkdir.

Görüşdə çıxış edən icma rəhbəri Devid Uolter dostluğun çətin olduğunu deyərək, dost olmaq istəyənin də nə etməli odluğunu bildiyini vurğulayıb. Daha sonra D.Uolter A.Paşazadəni dinlərin dostu olduğunu sübut etmiş şəxs kimi dəyərləndirib. D.Uolter icma adından A.Paşazadəyə dostluq təklif edib. İcma rəhbəri “Tövrat”da Allahın insanlara bir-birilərinə bağlı və bir-birindən asılı olması, “Allahın xeyir dualarının İsmayıla və İshaqa olması” deyimlərini xatırladaraq, bu dostluq üçün dua etməyin gərəkli odluğunu vurğulayıb.

Dağ Yəhudiləri dini icmasının rəhbəri Melix Yevdayev də Azərbaycanda tolerantlığın gerçəklik olduğunu qeyd edib. “Sinay Məbədi” dini icması gələn ölkə Allahın mərhəməti altında olur”, - deyə M.Yevdayev bu icma haqda mövqeyini bildirib.

Daha sonra qonaqlara xatirə hədiyyələri bağışlanıb. Axşam isə qonaqların şərəfinə QMİ sədrinin ziyafət düzənləməsi gözlənilir. -05C-