Əfqan Muxtarlının həyat yoldaşı Gürcüstanda qalmaq niyyətindədir

Azərbaycanlı müxalif jurnalist Əfqan Muxtarlının həyat yoldaşı Leyla Mustafayeva Gürcüstanı tərk etmək qərarını dəyişdirib. "Kavkazskiy uzel"in (Qafqaz qovşağı) yazdığına görə, o, bu barədə iyunun 3-də Tbilisidə keçirilən mətbuat konfransında bildirib.

Mayın 29-da Tbilisidə Azərbaycanlı jurnalist Əfqan Muxtarlı yoxa çıxıb. Mayın 30-da o, vəkil Nemət Kərimliyə zəng edib və deyib ki, onu Bakıya gətiriblər. Vəkil Elçin Sadıqovun sözlərinə görə, müvəkkili mayın 29-da Tbilisidə Gürcüstanın kriminal polisinin uniformasına bənzər geyimdə olan naməlum şəxslərin onu tutduqlarını, zorla maşına mindirib Azərbaycan sərhədi istiqamətində apardıqlarını danışıb. Mayın 31-də Muxtarlı qarşı dövlət sərhədini pozmaq və qaçaqmalçılıq ittihamlarına sərhəd işçisinə müqavimət göstərmək ittihamı da əlavə olunub. Elə həmin gün Bakıda məhkəmə jurnalistin həbsi haqqında qərar çıxarıb.

Azərbaycanlı müxalif jurnalist Əfqan Muxtarlı oğurlandıqdan sonra onun ailəsi Gürcüstanda qalmağın təhlükəsiz olmadığını düşünüb. Jurnalistin həyat yoldaşı KİV-ə bildirib ki, ailə Gürcüstanı tərk etmək niyyətindədir.

"İndi mən Tbilisidə qalmaq qərarına gəldim, çünki həyat yoldaşımın oğurlanması faktı üzrə aparılan araşdırmanın gedişatına nəzarət etməliyəm", deyə Mustafayeva Human Rights House (İnsan Hüquqları Evi) QHT-nin ofisində keçirdiyi mətbuat konfransında bildirib.

Mustafayevanın sözlərinə görə, nə o, nə də həyat yoldaşı Gürcüstandan siyasi sığınacaq almayıb. "Ölkədə qalmaq üçün icazə verilməsi xahişimiz belə təmin edilməyib. Bizə çox təhlükəli fəaliyyətlə məşğul olduğumuz, bunun Gürcüstanın maraqlarına uyğun olmadığı şəklində imtina cavabı veriblər", deyə o qeyd edib.

Leyla Mustafayeva bildirib ki, özünü təhlükəsiz hiss etmir. "Azərbaycandakı tanışlarımız deyirlər ki, məni də Azərbaycana aparmaq istədikləri haqqında şaiyələr gəzir. Amma mən bu şayiələrin nə dərəcədə həqiqətə uyğun olduğunu deyə bilmərəm", deyə o qeyd edib.

Mustafayeva həyat yoldaşının oğurlanmasını onun peşəkar jurnalist fəaliyyəti ilə əlaqələndirir.

"Biz Gürcüstanda da Azərbaycanda korrupsiya və insan hüquqlarının pozulması haqqında məlumat toplamağa davam edir, bu məlumatı dərc edirdik, - deyə o qeyd edib. - İstənilən material həyat yoldaşımın oğurlanmasına səbəb ola bilərdi".

Gürcüstanda Muxtarlının oğurlanması faktı ilə bağlı cinayət işi açılıb. "Prokurorluq insanın qanunsuz olaraq azadlıqdan məhrum edilməsi ittihamı nəzərdə tutan 143-cü maddə ilə cinayət işi açıb", bu barədə "Kavkazskiy Uzel"ə Human Rights House QHT-dən Gürcüstanda Muxtarlı ailəsini təmsil edən vəkil Arçil Çopikaşvili bildirib.

Mayın 31-də Tbilisidə etiraz aksiyasının iştirakçıları Gürcüstan hakimiyyətindən Əfqan Muxtarlının oğurlanması ilə bağlı izahat tələb ediblər.

Amnesty İnternational beynəlxalq hüquq müdafiə təşkilatı Gürcüstan hakimiyyətini oğurlanmada əli olmaqda ittiham edib. Baş nazir Georgi Kvirikaşvili inandırıb ki, Gürcüstan dövlət qurumlarının oğurlanma ilə əlaqəsi yoxdur. -0-