Kanal-13 internet televiziyasının ofisində və Əziz Orucovun mənzilində axtarış

Bakı/05.06.17/Turan: Kanal-13 internet televiziyasının ofisində və iyunun 1-də həbs edilmiş kanalın icraçı direktoru Əziz Orucovun evində axtarış aparılıb.

Ofisdən videokameralar, kompüterlər, digər elektron daşıyıcılar, sənədlər götürülüb, bu barədə Kanal-13-də redaktor işləyən jurnalistin həyat yoldaşı Lamiyə Orucova bildirib.

Onun sözlərinə görə, prokurorluq işçiləri mənzildən heç nə götürməyiblər.

L.Orucova qeyd edib ki, 2014-cü ildə telekanalın fəaliyyətini artıq yoxlamışdılar, amma iş bağlanmışdı. İndi üç il sonra cinayət işini bərpa ediblər.

O, xroniki böyrək çatışmazlığından, yüksək təzyiqdən əziyyət çəkən, ürəyində problemlər olan həyat yoldaşının səhhətinə görə narahatlığını bildirib. "Əzizi Kürdəxanı istintaq təcridxanasına yerləşdiriblər. Onun vəziyyəti pisləşsə buna görə onlar məsuliyyət daşıyacaqlar", deyə L.Orucova bildirib.

O hesab edir ki, ərini peşə fəaliyyətinə görə təqib edirlər.

Kanal 13 internet televiziyasının icraçı direktoru Əziz Orucovun 30 günlük inzibati həbs müddəti başa çatdıqdan sonra iyunun 1-də ona qarşı qanunsuz sahibkarlıq və vəzifə səlahiyyətlərindən sui-istifadə ittihamları irəli sürülüb. Bu barədə Turan-a vəkil Elçin Sadıqov bildirib.

Onun sözlərinə görə, Baş Prokurorluğun Ağır Cinayətlərə dair işlər üzrə İstintaq İdarəsi Orucovu CM-in 192.2.2 (böyük gəlir əldə etməklə qanunsuz sahibkarlıq) və 308.2-ci (vəzifə səlahiyyətlərindən sui-istifadə, ağır nəticələrə səbəb olduqda) maddələrində nəzərdə tutulan əməllərdə ittiham edirlər.

Sadıqov qeyd edib ki, Orucova qarşı iş 2014 ilin yazında onlarla QHT-yə qarşı açılmış ümumi işdən ayrıca icraata ayrılıb.

İttihamlar Kanal 13 və Qafqaz Media Araşdırmaları Mərkəzinin fəaliyyəti ilə bağlıdır.

Jurnalist ittihamları təkzib edib. -06D-