Ehtiyatda olan zabitlər ordu ətrafındakı qeyri-sağlam duruma son qoymağa çağırırlar

“Ehtiyatda və İstefada olan Zabitlər” İctimai Birliyi müdafiə naziri Səfər Əbiyevin  vəzifəsindən azad olunması və bundan sonra orduda baş verən olaylarla bağlı bəyanat yayıb.  

Qurumun sədri Yaşar Cəfərlinin KİV-ə ünvanladığı bəyanatda qeyd olunur ki, S.Əbiyevin müdafiə naziri kimi fəaliyyətinin və pensiya yaşına çatdıqdan sonra öz postunda qanunsuz olaraq qalmasının müzakirə edilməsinin əvəzinə ictimai diskussiyalar yalnış məcraya yönəldilir. Buna siyasi hakimiyyətin orduda yaranmış qeyri-sağlam durumla bağlı məsuliyyətdən qaçmaq cəhdi kimi baxmaq lazımdır.

Ehtiyatda olan zabitlər ictimai müzakirələr zamanı ordunun ölkədə mövcud olan “klanlar” arasındakı mübarizədə alətə çevrilməsi cəhdlərinin açıq-aşkar göründüyünü  bildirir, bu cəhdlərin ölkənin müdafiə qüdrətinə zərbə vuracağına şübhə etmir.  

Birlik ordu üzərində siyasi nəzarəti ələ keçirmək naminə atılan bu addımların dayandırılmasını, orduda qanunun aliliyinin və insan haqlarının təmin olunmasını,  uzun illər ərzində həyata keçirilən qeyri-demokratik idarəetmə üsullarına son qoyulmasını və xalqımızın orduya itirilmiş etimadının bərpa olunmasını qətiyyətlə tələb edir.

Müraciətdə deyilir ki, orduda  həyata keçirilən kadr dəyişiklikləri metod və prinsiplərinə görə ajiotaj xarakteri daşıyır, ictimai rəydə yeni rəhbərliyin köhnə nazirə görə bir qrup zabit və generaldan qisas alınması effekti yaradır. Belə yanaşma zabit və generallar arasında mənəvi-psixoloji durumun gərginləşməsinə, şəxsi heyətin döyüş ruhunun zəifləməsinə səbəb ola bilər.

Ordunu dövlətin ən mühüm strukturlarında biri hesab edən ehtiyatda olan zabitlər Silahlı Qüvvələrin Konstitusiya və qanunlar çərçivəsində  idarə edilməsini, digər bütün qanunsuz cəhdlərin qarşısının alınmasını tələb edir.

Ehtiyatda olan zabitlər siyasi rəhbərliyi  Səfər Əbiyevin təqribən 19 il ərzində müdafiə naziri vəzifəsində saxlanılmasını zəruriliyi, Səfər Əbiyevin həqiqi hərbi xidmətdə olmanın son yaş həddinə çatdıqdan sonra da (27 yanvar 2013-cü ildə onun 63 yaşı tamam olub və ehtiyata çıxmalı idi) 9 ay ərzində bu postda saxlanılmasının qanuni əsasları, onun müdafiə naziri kimi yenidən Nazirlər Kabinetinin tərkibində saxlanmamasının səbəbləri barədə suallara cavab verməyə çağırır.

Birlik bəyan edir ki, orduda həyata keçirilən kadr dəyişiklikləri zamanı tələskənliyə yol verilməməli, əvvəlki səhvlərin təkrarlanmaması məqsədilə qərarların layihələrinin müzakirəsi mərhələsində kollegiallıq təmin edilməli, kadrlar bilik, bacarıq, şəxsi keyfiyyət, topladığı təcrübə əsasında, ayrı-ayrı fərdlərə deyil, dövlətə və xalqa sadiqliyinə görə irəli çəkilməlidir.

Eyni zamanda qurum hüquq- müdafiə təşkilatı olaraq öz qərəzsizliyini nümayiş etdirərək  Səfər  Əbiyevin hüquqlarını ictimai əsaslarla müdafiə etməyə hazır olduğunu bəyan edir.0-