Ekspertiza deputat mandatı uğrunda alver haqqında videoyazıların orijinal olduğunu təsdiq etdi

Keçmiş deputat Gülər Əhmədovanın işi üzrə məhkəmə prosesində bu gün Azərbaycan Beynəlxalq Universitetinin keçmiş rektoru Elşad Abdullayevin yaydığı videoçarxın ekspertizasının nəticələri elan olunub.

Xatırladaq ki, Gülər Əhmədova fırıldaqçılıq və başqasının xüsusilə böyük ölçüdə əmlakını mənimsəmə, ağır cinayəti gizlətməkdə ittiham olunur. Hər iki maddə üzrə onu əmlakı müsadirə olunmaqla, 12 ilədək həbs cəzası gözləyir.

Onun həbsinə Abdullayevin 2012-ci ilin sentyabrında yaydığı video səbəb olub. Gizli kamera ilə çəkilmiş bu kadrlarda Əhmədova və onun tanışı Sevinc Babayevanın Abdullayevdən deputat seçilməsi üçün 1 mln. dollar tələb etdiyi görünür. Video yayıldıqdan sonra Babayeva Türkiyəyə qaçıb, 2012-ci ilin sonunda orada vəfat edib. Əhmədova videonun saxtalaşdırıldığını bildirib.

Lakin ekspertizanın nəticələrinə görə, videoyazı orijinaldır. Videoda görünən şəxslərin səsləri onların özlərinə aiddir. Söhbət iştirakçılarının mimika və jestləri nitqləri ilə sinxrondur. Videoda saxtalaşdırma yoxdur.

Bundan sonra prosesdə Babayevanın ölümü haqqında tibbi rəyin nəticələri elan edilib. Rəydə bildirilir ki, o, Türkiyəyə getməzdən əvvəl 1 saylı Şəhər Klinik Mərkəzində, Neftçilər Xəstəxanasında və Gömrük Hospitalında müayinədən keçib və baş fırlanması, ürək bulanması və qusmadan şikayət edib. Mərkəzi Gömrük Hospitalında ona pnevmoniya və infarkt diaqnozu qoyulub. Türkiyədə də o, bir sıra klinikalara müraciət edib. “Esenyurt” klinikasında onun ürəyi dayanıb və masaj və espirasiyadan sonra o, reanimasiyaya keçirilib. Daha sonra “Medicana İnternational” xəstəxanasına köçürülüb. Orada ağzından qan gəlib və komaya düşüb. Müayinə zamanı Babayevanın sağ ombasında iynə izləri və hematoma aşkarlanıb. Exokardioqramdan sonra ürəyin və ağ ciyərlərin fəaliyyətinin dayandığı müəyyən edilib.

Proses noyabrın 18-də davam edəcək. -06C-