Manat və xarici valyutalı kreditlər üzrə faizlər sentyabrda proporsional olaraq azalıb

Ölkə iqtisadiyyatının qalıq kredit həcmi 2013-cü ilin sentyabrında 338,2 mln. manat və ya 2,3% azalaraq, 14793,3 mln. manat təşkil edib.

Azərbaycan Mərkəzi Bankının məlumatına görə, son 12 ayda kredit məbləğinin artımı 3412,5 mln. manat və ya 29,9% təşkil edib. Gecikmiş kreditlərin ümumi göstəricidəki payı bu il oktyabrın 1-nə 5,4% təşkil edib (ötən il 6,7%).

Qısamüddətli kreditlər bir il ərzində 276 mln. manat və ya 8,7% artıb, uzunmüddətli kreditlər isə 3136,8 mln. manat və ya 38 % artıb. Uzunmüddətli kreditlərin qalığı 11365 mln. manata bərabər olub. Uzunmüddətli kreditlərin ümumi həcmi 76,8% təşkil edib (ötən il 72,3%).

Kreditlərin ümumi həcmində özəl bankların payı 62,6%-ə qədər azalıb, ölkənin ən böyük bankı olan Beynəlxalq Bankın payı 34,7%-ə qədər artıb, qalan 2,7% qeyri-bank kredit təşkilatlarının payına düşüb. 

Banklar tərəfindən real iqtisadiyyat sektoruna 98,53%, maliyyə sektoruna 1,47% kredit verilib. 1 oktyabr 2013-cü il tarixinə olan məlumata görə, fiziki şəxslərə ümumilikdə 5688,9 mln. manat və ya 38,5% kredit verilib. Ticarət və xidmətlər sahəsinə 2197,4 mln. manat və ya 14,9%, energetika və təbii sərvətlər sahəsinə 368,3 mln. manat və ya 2,5%, inşaat və əmlak sahəsinə 2283,8 mln. manat və ya 15,4%, sənaye və istehsalat sahəsinə 1467,4 mln. manat və ya 9,9%, nəqliyyat və rabitə sahəsinə 515,5 mln. manat və ya 3,5%, kənd təsərrüfatı və təkrar emal sahəsinə 705,9 mln. manat və ya 4,8% və s. kredit verilib. 

Xarici valyuta ilə verilən kreditlərin həcmi 28,9% təşkil edib. Ötən ilin müvafiq tarixində xarici valyutalı kreditlərin payı 32,9% təşkil edib.

Regional struktura əsasən, kreditlərin 86,5%-i Bakının payına düşür. Gecikmələrin 86,3%-i də paytaxtın payına düşür. Sentyabrda ölkə üzrə orta kredit faizi 14,4%-ə bərabər olub (keçən ay 14,1% təşkil edib).

Azərbaycan Mərkəzi Bankının məlumatına görə, sentyabrda manat kreditləri üzrə orta faiz 0,12% azalaraq, 14,14%, xarici valyutalı kreditlər üzrə 0,12% azalaraq 14,44% təşkil edib. İllik ölçüdə manat resursları 1,29 bənd, valyuta resursları isə 1,09 bənd ucuzlaşıb. Bu il oktyabrın 1-nə olan məlumata görə, manat kreditləri fiziki şəxslərə müvafiq olaraq 18,02% və 20,72%-lə verilib. Hüquqi şəxslər üçün bu göstəricilər müvafiq olaraq 11,37% və 10,91% təşkil edib. -15В-