Əli Həsənov xaricdə təhsil alan tələbələrə nəzarət etmək qərarına gəlib

“Xaricdə təhsil alan gənclər oxuduqları ali məktəblərdə, şəhərlərdə və ölkələrdə şəbəkələşməli, qrup halında təşkilatlanmalıdırlar. Həmin qruplar ASAİF-in tərkib hissəsi kimi fəaliyyət göstərməli, vahid mərkəzdən koordinasiya edilməlidir. Sözügedən qrupların əsas işi diaspor və lobbiçilik olmalıdır”, - Xaricdə Təhsil Alan və Məzun Olmuş Azərbaycanlı Gənclərin XII Beynəlxalq Forumunda Prezident Administrasiyasının ictimai-siyasi məsələlər şöbəsinin müdiri Əli Həsənov bildirib.

O,   xaricdə təhsil alan və məzun olmuş gənclərə bir neçə tövsiyəsini çatdırıb.

Ə. Həsənov deyib ki, , gənclər təhsil aldıqları ölkələrin mədəni həyatına sıx inteqrasiya olunmalı, Azərbaycan mədəniyyətini, tarixini, turizm potensialını, ölkədə gedən inkişaf prosesini xarici vətəndaşlara, həmyaşıd gənclərə tanıtmalı, Azərbaycanın tolerant ölkə imicini qorumalıdırlar.

“Bu baxımdan gənclərimiz olduqları ölkənin dilini öyrənməyə üstünlük verməli, mədəni dəyərlərinə hörmətlə yanaşmalıdırlar”, - o bildirib.
  PA rəsmisi deyib ki, 300-dən artıq dövlət qeydiyyatına alınmış gənclər təşkilatı mövcuddur:
"Bu gün həmin təşkilatlardan birinin - ASAİF-in növbəti forumudur. Xarici ölkələrdə təhsil alan gənclərimizin təhsili ilə yanaşı, onların ictimai həyatı və təşkilatlanması bizim üçün önəmli məsələlərdəndir”, - o vurğulayıb.

O hesab edir ki, ASAİF ölkə hüdudlarından kənarda təhsil alan və məzun olmuş azərbaycanlı gənclərin şəbəkələşməsini və fəaliyyətinin əlaqələndirilməsini təşkil etmək məqsədilə yaradılıb-16D-