Əli İnsanov: �Demokratik inqilab orman yanğını kimi yaxınlaşır� (YENİLƏNİB)

Bakı/26.04.17/Turan: Əli İnsanov sön sözündə ona qarşı irəli sürülən ittihamları rədd edərək öz işinin siyasi xarakterli olduğunu bildirib.

Dəmir barmaqlıq arxasında  olan Ə.İnsanov iclasdan öncə Turan-ın müxbirinə deyib: “Vəziyyətim yaxşıdır. Hər gün bir saat idmanla məşğul oluram. Hətta turnikdə 12 dəfə dartınıram”.

Ona qarşı münasibətlə bağlı sualın cavabında deyib: “Mənə qarşı münasibət Hitlerin ölüm düşərgəsində yəhudiyə olan münasibət kimidir. Ancaq İnsanovu sındırılmış görmək istəyənlər buna nail olmayacaqlar”.

O qeyd edib ki, prokurorun söylədiyi müddət o deməkdir ki, onu daha iki prezident seçkisində iştirakdan məhrum etmək istəyirlər. Ancaq “demokratik inqilab Azərbaycana orman yanğınları kimi gəlir”.

“Qoy, bizim kral və kraliçamız bu barədə düşünsünlər”,-Ə.İnsanov vurğulayıb.

O, prokuror və hakimə müraciətlə deyib: “Vaxt gələcək sizə də qiymət verəcəklər. Bu gün gülürsünüz, ancaq hökmü başqaları çıxaranda gülə bilməyəcəksiniz”.

Sonra dövlət ittihamçısı Fəraim Hüseynli bildirib ki, məhkəmə Ə.İnsanovun günahını sübuta yetirib, onun işində yumşaldıcı hal yoxdur və o mühakimə olunmalıdır.

Zərərçəkən - ədliyyə mayoru Anar Məmmədov da Ə.İnsanovun cəzalandırılmasını istəyib.

Vəkil Şahverdi Ağaveyis bildirib ki, Ə.İnsanova qarşı yeni məhkəmədə yeganə məqsəd 11 il həbs cəzasından sonra onu azad etməməkdir. Məhkəmə qərəzli olub və saxta dəlillərə əsaslanıb.

Vəkil Toğrul Babayev də Ə.İnsanova qərəzli münasibətin olduğunu bildirib.

“Hətta kiloqramlarla narkotik maddə alveri edənlərə 8 il cəza vermirlər”, - T.Babayev vurğulayıb.

Vəkil diqqəti ona yönəldib ki, məhkəmə istintaqı zərərçəkənin sağlamlığına hansı ziyanın dəydiyini müəyyən etməyib. Belə ki, o, iki gündən sonra prokurorluqda rahat şəkildə ifadə verib.

Qısa məşvərətdən sonra məhkəmə Ə.İnsanovu ciddi rejimli koloniyada saxlanmaqla 7 il 5 gün azadlıqdan məhrum edib.

Müdafiə tərəfi hökmdən apellyasiya şikayəti vermək niyyətindədir.03C06--

*   *   *

2017 Aprel 26 (Çərşənbə) 18:31:32

Əli İnsanov 7 il 5 gün müddətinə azadlıqdan məhrum edilib (yenilənib)

Bakı/26.04.17/Turan: Aprelin 26-da Qaradağ Rayon Məhkəməsi keçmiş səhiyyə naziri Əli İnsanovu  7 il 5 gün müddətinə azadlıqdan məhrum  edib.

Bu gün dövlət ittihamçısı yekun çıxışında Ə.İnsanovu koloniya nəzarətçisinə hücumda və ona xəsarət yetirməkdə, həmçinin narkotik maddə saxlamaqda  təqsirli bilərək  8 il 9 ay müddətinə azadlıqdan məhrum  edilməsini istəyib.

Xatırladaq ki, Ə.İnsanov 2005-ci ilin oktyabrında dövlət çevrilişinə cəhd ittihamı ilə həbs olunub. Sonradan iqtisadi cinayətlərə görə 11 il azadlıqdan məhrum edilib.

2016-cı ilin oktyabrında həbs müddətinin bitməsinə 56 gün qalmış ona qarşı CM-in 234.1 (narkotik maddənin əldə edilməsi və saxlanması) 315.2 (vəzifə xidmətini yerinə yetirərkən hakimiyyət nümayəndəsinə müqavimət göstərmək), 317 2.1  (qadağan olunmuş əşyaların hazırlanması, saxlanması və gəzdirilməsi) maddələri ilə yeni ittihamlar irəli sürülüb.

2016-cı il oktyabrın 11-də Qaradağ Rayon Məhkəməsi onun həbsi barədə qərar çıxarıb.

2013-cü il martın 14-də Avropa məhkəməsi Ə.İnsanovun ədalətsiz mühakimə edilməsi barədə qərar çıxarıb. Ancaq Azərbaycan hakimiyyəti hökmü dəyişməyib.

Avropa Şurası Nazirlər Komitəsi dəfələrlə Azərbaycan hökumətini Avropa məhkəməsinin  qərarını yerinə yetirməyə çağırıb.

Hüquq-müdafiə təşkilatları Ə.İnsanovu siyasi məhbus kimi tanıyıblar.03С06--