Əlil övladları olan valideynlərin aksiya keçirdiyi deyilir

Bakı/10.03.21/Turan:  Bu gün əlil övladları olan bir qrup valideyn Əmək və Əhalinin Sosial Müdafiəsi Nazirliyinin qarşısında aksiya keçiriblər.

Onların etirazına səbəb əlil övladlarının müalicə imkanlarının azalması, əlillərə göstərilən qayğının yetərli olmaması, əlil ailələrinə etinasız münasibət, müavinətlərin azlığı, əlillərin cəmiyyətə inteqrasiya səviyyəsinin aşağı olmasıdır.

Valideynlərin fikrincə, əlil övladları cəmiyyətdən təcrid olunmuş şəkildə yaşamağa məhkumdur və bu, çox ağırdır.

Şikayətçilərin adından söz alan Qarabağ qazisinin xanımı Günay Göyüşova deyib ki,  ötən ilin noyabrından uşaqların əlillik pensiyası kəsilib. Onun deməsinə görə, əlil övladları əvvəllər iki aydan bir müalicə alırdı, sonra pandemiya ilə bağlı reabilitasiya mərkəzləri bağlanıb: “İndi isə qazilərimizə xidmət edir. Bizim uşaqlara ildə bir dəfə müalicə imkanı yaranır, bu, çox azdır. Əlilliyə görə verilən 150 manat yetmir, özəl xəstəxanalarda müalicə imkanımız yoxdur. Məmurlar şikayətimizə baxmırlar.”

İki əlil övladı olan bir qadın isə onları saxlamaq və böyütməyin çətin olduğunu bildirib.  

Şamaxı rayonundan gələn Qarabağ müharibəsi iştirakçısı, II qrup əlil üç aydır pensiyasının kəsildiyini, evinin yandığını, ailəsilə birgə qarajda qaldığını söyləyib.

Əmək və Əhalinin Sosial Müdafiəsi Nazirliyinin ictimaiyyətlə əlaqələr və kommunikasiya şöbəsinin müdiri Fazıl Talıbov aksiya barədə Turan-ın sualını cavablayaraq şikayətçilərin nazirlikdə qəbul olunduğunu bildirib.

Onun deməsinə görə, karantin qaydalarına uyğun olaraq qəbula gələnlərin şikayətləri qeydə alınıb, aidiyyatı şöbələrə yönləndirilərək qısa müddətdə araşdırılıb rəsmi cavab veriləcək. -05B-