Ötən il 138 bələdiyyə sədri inzibati məsuliyyətə cəlb edilib

Bakı/10.03.21/Turan: Ötən il 138 bələdiyyə sədri İnzibati Xətalar Məcəlləsinin 549-cu (bələdiyyələrin fəaliyyətinə inzibati nəzarəti həyata keçirən orqanın fəaliyyətinə mane olma) maddəsinə əsasən inzibati məsuliyyətə cəlb edilib. 23 halda ciddi qanun pozuntuları aşkar edilərək toplanmış sənədlər istintaq orqanlarına göndərilib. Həmin materiallardan 10-u üzrə cinayət işi başlanılıb. Bu barədə Milli Məclisin martın 9-da keçirilən iclasında “Bələdiyyələrin fəaliyyətinə inzibati nəzarəti həyata keçirən orqanın illik hesabat məruzəsi”ni təqdim edən ədliyyə nazirinin müavini, II dərəcəli dövlət ədliyyə müşaviri Vilayət Zahirov  bildirib.

Hesabata görə, ötən il ərzində Ədliyyə Nazirliyində 79 858 bələdiyyə aktına inzibati nəzarət qaydasında baxılıb. Nəticədə 76 433 akt qanunvericiliyə uyğun hesab edilib.  

Məlumata görə,  bələdiyyələrin fəaliyyətilə bağlı 3 206 müraciətə baxılıb və bu müraciətlərin 164-ü təmin edilib. Qanunvericiliyin tələblərinə zidd olan 3267 bələdiyyə aktının dəyişdirilməsi və ya ləğv edilməsilə bağlı aidiyyatı bələdiyyələrə müraciət olunub: “Bu təkliflər əsasında 1666 akt ləğv edilib, 1384 akt dəyişdirilib. Bələdiyyələrin təmin etmədiyi 15 təklif üzrə məhkəmələrdə qaldırılmış iddialardan 2-i təmin edilib”, - hesabatda bildirlir.-0-