Elman Yusifov: Ümid edirəm ki, ANS gəlib əmlakını binadan çıxaracaq

Bakı/21.04.17/Turan: ANS-lə durum gərgin və arzuolunmazdır. Qarşı tərəf faktları düzgün ifadə etmir.  Bu barədə Turan-a Zoologiya İnstitutunun direktoru Elman Yusifov bildirib. 

“Reallıq budur ki, ANS Zoologiya İnstitutunun yerləşdiyi binada 3000 kvadrat metr qeyri-yaşayış sahəsini zəbt edib. Belə ki, ANS-in Dövlət Əmlak Komitəsi ilə bağladığı icarə müqviləsi 2016-cı il oktyabrın 1-dən qüvvədən düşüb. Bu sahənin 1000 kvadratmetrinin qapıları (binanın birinci mərtəbəsi) istintaq orqanı tərəfindən möhürlənib və polis nəzarətindədir. Qalan 2000 kvadrat metr ərazidən isə ANS əmlakını çıxarmır. Əvəllər ANS rəhbəliyi telefona cavab verirdi və əmlaklarını boşaldacağını bildirirdi. Son vaxtlar telefonlarına ümumiyyətlə cavab vermirlər. Belə olan halda biz əmlakın binadan çıxarılmasına kömək etmələri üçün Baş Prokurorluğa müraciət etdik. ANS Baş Prokurorluğa bildirir ki, guya biz onları binaya buraxmırıq. Bu, həqiqətə uyğun deyil”, deyə o qeyd edib.

Yusifov ANS-ə müraciət edərək bildirib: “Ümid edirəm ki, gəlib əmlaklarına sahib durub, icarə və kommunal xərclərini ödəyəcəklər”. -03C-