Elmlər Akademiyasında Sovet İttifaqı davam edir

Turan-ın redaksiyasına gələn universitet məzunu (magistr) bir gənc Azərbaycan Milli Elmlər Akademiyasının doktoranturasına qəbul olmaq üçün doldurulması gərəkən boş blankı göstərdi. Deyir ki, Elmlər Akademiyasına qəbul olmaq üçün ərizə verənlərin hamısı bu cür blankları doldurur. İddiaçılardan milliyyət, siyasi mənsubiyyət (partiya üzvlüyü), partiya cəzalarının olması, partizan dəstələrində iştirakı, ictimai mənşə, hərbi xidmət, qoşun növləri və s. soruşulur.

Gənc magistr təəccüblənib ki, ondan keçdiyi həyat yolunu sadalamaqla yazılı tərcümeyi-hal tələb ediblər. Halbuki, bütün dünyada, eləcə də Azərbaycanda çoxdan standart və yığcam CV-lərdən istifadə etməyə başlayıblar. Magist AMEA-nın əsassız maraq dairəsindən əsəbiləşib və bu sualların səbəblərini araşdırmağı xahiş edib.

AMEA-nın mətbuat xidmətinə və kadrlar şöbəsinə müraciət edərək izahat istədik: Hansı əsaslarla vətəndaşlardan milli, siyasi mənsubiyyət, hətta partizan dəstələrində iştirak barədə soruşulur? Axı, Azərbaycan vətəndaşının şəxsiyyət vəsiqəsində bu məlumatlar göstərilməyib. Hərbi xidmət və vətəndaşın xidmət etdiyi qoşun növü məsələsini başa düşmək olar. Partizan dəstələri barədə sual nə deməkdir? Əgər Azərbaycan vətəndaşının etnik erməni olduğu ortaya çıxarsa, milli səbəbə görə AMEA-nın magistraturasına qəbul etməyəcəklərmi?

Mətbuat xidmətində bu sualları cavablandıra bilmədilər və AMEA-nın kadrlar şöbəsinə müraciət etməyi tövsiyə etdilər. Orada bildirdilər ki, işçilər kadr xidməti haqda təlimatda  sadalanan məlumatlara sahib olmalıdır.  Təlimat sosial kart, bank kartı, vətəndaşın orduda xidməti və hərbi çağırış üçün lazım olan digər məlumatların, AMEA əməkdaşının hesabına pul vəsaitinin köçürülməsini və s. bilgilərin göstərilməsini tələb edir.   Lakin vətəndaşların siyasi mənsubiyyəti və partizanlıq həyatı kadrlar üçün maraqlı deyil.

Blankların fotosunu sosial şəbəkədə yerləşdirdik və hasilat sənayesində ixtisaslaşmış hüquq müdafiəçisi  Mirvari Qəhrəmanlının replikasını oxuduq. Onun sözlərinə görə, 28 May NQÇİ-də işə düzəlmək üçün partiya mənsubiyyəti haqda sualı cavablandırmaq lazımdır. Bu blanklar qorxaq və qeyri-peşəkar məmurun ağlının məhsuludur.

Sonrakı jurnalist araşdırması göstərdi ki,  Azərbaycan köşklərində təəccüb doğuran sualları olan blanklar satılır. Vətəndaşlar AMEA, Bakı Dövlət Universiteti və digər müəssisələrə işə düzələrkən həmin blankları alıb doldurub müvafiq qurumun kadrlar şöbəsinə təqdim edirlər. Və orada da sadalanan suallardan təəccüblənmədən blankları qəbul edirlər.

Məlum olur ki, müstəqil Azərbaycanın vətəndaşlarını qorxunc DTK-lı  sovet keçmişinə qaytaran və qəribə sualları olan bu blanklar şəxsi mətbəələrdə yayımlanır və istənilən hər kəsə satılır.

Bu vəziyyətdə AMEA-nın prezidenti Ramiz Mehdiyev, həmçinin digər müəssisələrin rəhbərləri Turan-ın sualına cavab verməlidirlər: Niyə tabeliyində olan işçilər şəxsi həyat, siyasi üstünlüklər, vətəndaşların milliyyəti kimi  sualların olduğu blankların doldurulmasını tələb edirlər, belə soruların qanunsuz olduğunu bilirlərsə əgər? Bəyəm Azərbaycan rəhbərləri bilmirlər ki, Sovet İttifaqı 1991-ci ildə süqut edib?