Emil Məmmədov 3 ay müddətinə həbs edilib (YENİLƏNİB)

Bu gün Salyan rayon məhkəməsi “Demokratiyaya yardım” QHT-nin rəhbəri Emil Məmmədov barəsində 3 ay həbs qətimkan tədbiri seçib. Bu barədə Turan-a onun qardaşı İqrar Məmmədov bildirib.

Onun sözlərinə görə, E.Məmmədov zorla pul tələb etməkdə ittiham olunur. Lakin fəal ittihamları təkzib edir və onları siyasi motivli hesab edir.

E.Məmmədov dövlət vəkilindən imtina edib. Mayın 13-də saat 17.00-da saxlanılmış Məmmədovun doğmaları ilə görüşməsinə imkan vermirlər.

Aprelin 17-də sözügedən QHT-nin digər fəalı Tofiq Qasımov zorla pul tələb etmək ittihamı ilə 2 ay müdətinə həbs edilib. O, təzyiq altında Məmmədova böhtan atıb ki, guya QHT rəhbərinin tapşırığı ilə o, rayon idarələrinin rəislərindən İnternetdə rüsvayedici materiallar yaymamaq üçün pul tələb edib.

Məmmədov özü bir müddət əvvəl rayonda korrupsiya faktlarını ifşa etdiyinə görə cinayət işinin Salyan rayon icra başçısı tərəfindən saxtalaşdırıldığını bəyan edib.

* Demokratiyaya yardım” QHT cənub regionunda ən fəal vətəndaş cəmiyyəti institutlarından biridir. Qurumun rəhbəri E.Məmmədov dəfələrlə rayon hakimiyyəti strukturlarında korrupsiya faktlarını açıqlayıb, həmçinin yerli sakinlərn hüquqlarının müdafiəsinə qalxıb. QHT hasilat sənayesində vətəndaş nəzarəti şəbəkəsinin bir sıra layihələsində iştirak edib. Bütün bunlar hakimiyyəti çox qıcıqlandırıb və fəala qarşı təqib kampaniyası başlayıb. O, dövlət əleyhinə fəaliyyətdə ittiham olunur. -06B-

*   *   *

2014 May 14 (Çərşənbə) 18:28:33

Mayın 13-də Salyan rayonunda “Demokratiyaya Yardım” İctimai Birliyinin rəhbəri Emil Məmmədov zorla pul tələb etməkdə şübhəli bilinərək saxlanılıb.

Turan-ın saxlanılmanın səbəbi ilə bağlı sorğusuna cavabda Daxili İşlər Nazirliyinin mətbuat xidmətinin şöbə rəisi Orxan Mansurzadə bildirib ki, ötən ay “Demokratiyaya Yardım” İctimai Birliyinin əməkdaşı Tofiq Qasımov saxlanılıb. Buna səbəb onun barəsində Salyan Polis Şöbəsinə şikayətlər daxil olmasıdır.

“Rayonda yerləşən bəzi dövlət qurumlarının məsul nümayəndələri polisə müraciət edərək, Tofiq Qasımov adlı şəxsin barələrində rüsvayedici məlumatlar yayma hədəsi ilə dəfələrlə onlardan pul aldığını bildirib, sonuncu şəxs haqqında müvafiq ölçü götürülməsini xahiş ediblər. Həmin müraciətlər əsasında Salyan RPŞ-də araşdırma aparılıb, ərizələrdə göstərilən xüsusatlar öz təsdiqini tapdığı üçün faktla bağlı İstintaq bölməsində Cinayət Məcəlləsinin 182.2.2-ci maddəsi ilə (Hədə-qorxu ilə tələbetmə) cinayət işi balanılıb, cari il aprelin 16-da məhkəmə tərəfindən Tofiq Qasımov barəsində həbs-qətimkan tədbiri seçilib”, deyə Mansurzadə qeyd edib.

Onun sözlərinə görə, Tofiq Qasımov istintaqda etiraf edib ki, o, bu işləri üzvü olduğu “Demokratiyaya Yardım” İctimai Birliyinin rəhbəri Emil Məmmədovun tapşırığı əsasında həyata keçirib.

“Emil Məmmədovla bağlı rayonda yüksək vəzifə tutan iki nəfər də polisə müraciət edərək birinci şəxsin onlardan pul tələb etdiyini bildiriblər. Belə olan halda sözügedən şəxsin də RPŞ-ə çağırılması zərurəti yaranıb və Emil Məmmədov polis tərəfindən şübhəli şəxs qismində saxlanılıb. Bəzi KİV-lərdə Tofiq Qasımovun guya təzyiq altında Emil Məmmədova böhtan atması, sonuncuya qarşı ifadə verdikdən sonra ona vəd olunmuş azadlığın əvəzinə həbs olunması barədə yazılanların, məsələnin zorla siyasiləşdirilməsinin heç bir hüquqi əsası yoxdur. Bir daha xatırladıram ki, burada söhbət yalnız konkret şəxslərin törətdikləri cinayət xarakterli əməldən gedir ”, deyə o qeyd edib. -03B-