Emin Millinin qohumları ondan imtina ediblər

KİV-də “Meydan TV” on-line televiziyasın rəhbəri Emin Millinin 23 qohumu adından prezident İlham Əliyevə müraciət yayılıb. Müraciətdə qohumları Emin Millidən imtina etdiklərini bildirirlər.

Müraciətdə qeyd edilir ki, Emin Abdullayev (Milli) “xarici qüvvələrin təsiri altında öz çirkin məqalələrində və çıxışlarında respublikamızın sosial və iqtisadi sahədəki böyük uğurlarını, onun tərəqqisini şübhə altına salır, özünü qəhrəman kimi göstərməyə çalışır”.

Müəlliflər iddia edirlər ki, dəfələrlə ondan bu fəaliyyətdən imtina etməyi tələb ediblər, “düz yola” gəlməyə çağırıblar.

Lakin Milli bundan imtina edərək, qohumlarına onu “unutmağı” təklif edib.

Müraciət müəllifləri həmçinin Millini Azərbaycan cəmiyyətində ayrı-seçkilik salmaq cəhdində ittiham edirlər.

“Görünür, o, xaricdə ailəsiz, qohumlarsız, dinsiz, dilsiz, mentalitetsiz yaşamağı üstün tutur”, deyə 23 şəxsin – Emin Millinin qohumlarının, əsasən Neftçala rayon sakinlərinin imzaladığı məktubda qeyd edilir.

Lakin müraciətdən müəlliflərin nə istədiyi aydın deyil – ya İlham Əliyevə şikayət edirlər, ya da Emin Millinin fəaliyyətinə görə xoşagəlməz hallarla qarşılaşacaqlarından qorxurlar. -06D-