Ən yaxşılar Rusiyanı tərk edirlər

Bakı/05.03.22/Turan: Ukrayna ilə müharibə, müəssisələrin, şirkətlərin, mehmanxanaların bağlanması, sosial şəbəkələrin bloklanması, aparıcı azad KİV-lərin qadağan edilməsi, çökmüş iqtisadiyyat, özgəfikirlilərə qarşı polis repressiyaları və ümumi səfərbərlik təhlükəsi rusiyalıları ölkədən çıxmağa sövq edir. Təktərəfli bilet alan Rusiya vətəndaşlarının Avropa, İsrail, Gürcüstan, Birləşmiş Ərəb Əmirliklərinə axını artır.

“Euronews” telekanalı Rusiya Federasiyasından dəmir yolu ekspresinin getdiyi Finlandiyadan reportajı hələ də yayımlayır. Aparıcı deyir ki, bu, Rusiyadan gələn sonuncu nəqliyyatdır. Vaqonlardan əllərində yüklər olan ruslar çıxırlar. Yüklərdən səfərin birtərəfli olduğu aydın olur. Hərbi səfərbərlikdən və yoxsulluqdan qorxan vətəndaşların Rusiya Federasiyasından kütləvi şəkildə getməsi, bəzilərinin isə mənəvi səbəblərdən ölkəni tərk etməsi barədə məlumat verilir.

Hər kəs Rusiyanı tərk edə bilməz, bəzilərinə qarşı Rusiyanın "Qarant" sistemi fəaliyyət göstərir. Sistemin saytında xəbərdarlıq edilir: dövlət sirlərinə çıxışı olanlar; hərbi və ya alternativ mülki xidmət keçənlər; cinayətdə şübhəli bilinən və ya ittiham olunanlar; cinayət törətməyə görə mühakimə olunanlar; məhkəmə tərəfindən qoyulmuş öhdəliklərdən yayınanlar; səyahət sənədləri tərtib edilərkən bilərəkdən yalan məlumatlar təqdim edənlər; FTX əməkdaşı olanlar ölkədən çıxa bilməzlər.

"Ukraynada "xüsusi əməliyyat"ın altıncı günündə bizi - ən azı bəzilərimizi çaxnaşma hissi bürüdü. Deyəsən, gedişin müzakirə olunmadığı çat və şirkətlər qalmadı – zarafatlaşırıq, guya planlaşdırılmamış ödənişsiz tətilə gedirik. Məqsədlər bəlli deyil, niyyətlər də, mümkün səfərbərlik haqda şayiələr dolaşır, heç kim tərəfindən təsdiqlənmir, ancaq aktiv şəkildə təkzib də edilmir...

...baqajın sayında dəyişikliklər var - indi sərnişinlərin ya ümumiyyətlə, çantası yoxdur, ya da onların sayı çoxdur. Heyvanların sayı isə dərhal diqqəti cəlb edir. Hər on dəqiqədən bir itlərin ulamasını və ya hürməsini eşitmək olur.  Belə çıxır ki, uzun müddətə getməyi düşünənləri ev heyvanlarına görə müəyyən etmək olur " (the-village.ru).

Əslində, əhalinin ağıllı təbəqəsinin qaçışı indi başlamayıb. 2021-ci ilin iyulunda  Levada Mərkəzi bildirmişdi ki, Rusiya Federasiyasının hər beşinci sakini (22 faiz və ya demək olar ki, 32 milyon nəfər) daimi yaşamaq üçün xaricə getmək istəyir. 2017-ci ildə respondentlərin 15 faizi bu fikirdə idi. Həmişəlik getmək istəyənlərin əksəriyyəti gənclərdir. Ancaq o vaxt Putin Ukraynaya hücum etməmişdi və Zaporojye AES-ə atəş açmamışdı ...

2000-2020-ci illər arasında 4-5 milyon rus ölkəni tərk edib. 2021-ci ildə 275 mindən çox ölkə vətəndaşı Rusiya Federasiyasını tərk edib. Miqrasiya axınları MDB ölkələri ilə uzaq xarici dövlətlər, əsasən Avropa və Şimali Amerika arasında bərabər bölünüb. Bu barədə Rusiya statistikasının məlumatlarına əsaslanan “Dəqiq olsaq” layihəsinin araşdırmasında deyilir. 31 dekabr 1999-cu ildə Putin prezident oldu. Son illərdə rusların daimi yaşamaq üçün getmək istədikləri ölkələr arasında Çin liderdir, həmçinin Hindistan, Türkiyə, Vyetnam da populyardır.--0--