Reuters

Reuters

Bakı/21.06.21/Turan: İyunun 20-də Ermənistanda keçirilən növbədənkənar parlament seçkilərində baş nazir vəzifəsini icra edən Nikol Paşinyanın «Vətəndaş Sazişi» bloku 53,92 faiz səs yığaraq qalib gəldi.

Onun əsas rəqibi sayılan Ermənistanın ikinci prezidenti Robert Köçaryanın başçılıq etdiyi «Ermənistan» bloku isə 21,04 faiz səs toplayıb.

Ümumilikdə isə Ermənistan tarixindəki ikinci növbədənkənar parlament seçkilərində 21 partiya və 4 blok iştirak edib.

Ermənistan Mərkəzi Seçki Komissiyasının açıqladığı nəticələr isə N.Paşinyana təkbaşına hökümət formalaşdırmağa imkan verir.

Nikol Paşinyanın qələbəsindən sonra Azərbaycan-Ermənistan münasibətlər necə inkişaf edəcək? Hansı proseslər baş verəcək?

Milli Məclisin Beynəlxalq münasibətlər və parlamentlərarası əlaqələr komitəsinin üzvü Elman Nəsirov Turana bildirib ki, indidən müəyyən nikbin proqnozlar vermək mümkündür. «Əvvəla Paşinyan bu seçkilərə daha çox regionda sülhün təminatı, Robert Köçaryan isə revanşist şuarları ilə gəlirdi. Deməli erməni xalqı Paşinyana səs verməklə müharibəyə yox deyib, əməkdaşlıq lehinə münasibət bildirib».

Deputatın fikrincə bu, o deməkdir ki, Zəngəzur dəhlizi işə salınacaq. «Çünki bu Ermənistanın özü üçün çox vacibdir».

Eyni zamanda, komitə üzvü hesab edir ki, Nikol Paşinyan işğaldan azad olunmuş ərazilərin növbəti mina xəritələrini Azərbaycana verəcək. «Çünki onsuz əməkdaşlıq mümkün deyil. Eyni zamanda həm Azərbaycan, həm Türkiyə prezidentlərinin irəli sürdükləri altı tərəfli əməkdaşlıq platforması artıq real məzmun ala bilər. Yəni Ermənistanın bu platformada iştirak etməsi artıq real görünür».

E.Nəsirov qeyd edib ki, bunun nəticəsində Ermənistana təbdiq edilən blokada aradan qalxa bilər. «Ən əsası odur ki, Ermənistan xalqı birmənalı şəkildə əməkdaşlığın lehinə olan mövqe bildirib».

Deputatın qənaətincə Azərbaycanla Ermənistan arasında sülh müqaviləsinin imzalanması artıq labüd görünür. «Sülh müqaviləsinin olmaması əməkdaşlığın həyata keçirilməsinə ciddi mane olur. Azərbaycan Prezidenti cənab İlham Əliyevin Ermənistan tərəfinə ünvanladığı sülh müqaviləsinin imzalaması ilə bağlı təkliflərinə reaksiyanın olmaması daha çox seçkilərlə bağlı idi. Seçkilərdə qalib gələn Paşinyanın artıq belə bir müqavilənin imzalamasında maraqlı olacağı istisna deyil».

Atlas Araşdırmalar Mərkəzinin rəhbəri Elxan Şahinoğlu isə AzadlıqRadiosuna bildirib ki, Nikol Paşinyanın qələbə qazanması müəyyən mənada Azərbaycanın faydasına oldu. «Çünki Köçaryan gəlsəydi təxribatlara başlayacaqdı və biz də onunla obyektiv səbəblərə görə münasibətləri qura bilməyəcəkdik. Düzdür, Paşinyanın da böyük yanlışları oldu, onlardan biri də müharibənin ağır nəticələridir. Amma həmin nəticələr və seçki nəticələri də onu göstərir ki, Ermənistan cəmiyyəti Qarabağ yükündən qurtulmaq istəyir və Azərbaycanla müharibə istəmir».

Ekspert qeyd edib ki, Nikol Paşinyan Qərbdən də dəstək alacaq. «Seçki nəticələri faktiki tanındı. Paşinyan isə seçkidən qabaq özü demişdi ki, minalanmış ərazilərin bütün xəritələrini Azərbaycana təhvil verəcək, bunun qarşılığında isə biz ermənilər əsir dedikləri terrorçuların bir qismini qaytaracayıq. Bu istiqamətdə irəliləyiş əldə etmək olar».

Politoloq hesab edir ki, Ermənistan təxribatlara yol verməsə sərhədlərin müəyyələşdirilməsi istiqamətində dialoq mümkündür. «Türkiyə ilə də sərhədlərin açılması bu il reallaşa bilər. Paşinyanın təyin edəcəyi nazirlərdən də çox şey asılıdır. O, elə xarici işlər, müdafiə nazirləri təyin etməlidir ki, təxribatlara baş vurmasınlar».

E.Şahinoğlunun fikrincə, seçkilərdə Nikol Paşinyanın qalib gəlməsində Azərbaycanın da müəyyən rolu oldu. «Şuşa Bəyannaməsi, üstəgəl 15 nəfəri Ermənistana qaytarılması Ermənistan cəmiyyətinə göstərdi ki, Paşinyan hakimiyyətdə qalsa bu məsələ müsbət həll oluna bilər».

Ekspert deyir ki, bu ilin sonuna qədər Azərbaycan-Ermənistan sərhədlərin müəyyələşməsi, Ermənistan-Türkiyə sərhədlərin açılması sürətlənə bilər və regional formatda əməkdaşlıq istiqamətdə müəyyən addımlar da ola bilər. «Müəyyən müsbət atmosfer yaradılsa bu il ərzində İlham Əliyevin Paşinyanla görüşü də mümkündür. Ən əsası isə Rusiyanın bölgədə rolu azalması istiqamətində ciddi addımlar atıla bilər. Rusiya vasitəçilikdənsə Azərbaycan və Ermənistan Gürcüstanı seçə bilər».--0--

 

 

Rəy yaz

Cəmiyyət

Zorakılıq cəmiyyətdə nəyin göstəricisidir? – Mehriban Vəzir Çətin sualda



Əziz Bakı şəhəri sakini!

Siz də Qlobal İqlim Dəyişmələri ilə mübarizəyə öz töhfənizi verə bilərsiniz

Dear resident of Baku city!

You too can contribute to the fight against Global Climate Change

Дорогой житель города Баку!

Вы тоже можете внести свой вклад в борьбу с глобальным изменением климата

Bizi sosial şəbəkələrdə izləyin

Xəbər lenti