E.Qasımovun şikayətinə "yox" dedilər

İyulun 28-də Bakı Apellyasiya məhkəməsində “Müsəlman Birliyi Hərəkatı” adlı təşkilatın sədr müavini Elçin Qasımov barəsində həbs qətimkan tədbiri müddətinin uzadılması haqda Nəsimi rayon məhkəməsinin  qərarından verilən  şikayətə baxılıb. Bu haqda Turan-a E.Qasımovun vəkili Elnur Nəbiyev bildirib.

Vəkilin sözlərinə görə, prosesdə qərar elan olunub. Qərara əsasən, E.Qasımovun apellyasiya şikayəti təmin olunmayıb, Nəsimi Rayon məhkəməsinin  qərarı qüvvədə saxlanılıb.

Xatırladaq ki, Nəsimi Rayon Məhkəməsi iyulun 16-da E.Qasımov barəsində seçilən həbs qətimkan tədbirinin müddətinin uzadılması haqda istintaq orqanının təqdimatına baxıb. E.Qasımov barəsində seçilmiş həbs qətimkan tədbiri daha 3 ay artırılıb.

Qeyd edək ki, Daxil İşlər Nazirliyi 2015-ci il noyabrın 26-da Bakının Nardaran kəndində əməliyyat keçirib. Bu əməliyyatda 2-si polis, 4-ü mülki vətəndaş olmaqla, 6 nəfər həyatını itirib. Aparılan həbslər sırasında “Müsəlman Birliyi” Hərəkatının bir qrup üzvü və kənd sakini saxlanılıb.

E.Qasımov hələ bu əməliyyata qədər, 2015-ci il noyabrın 5-də Sabunçu rayon polis idarəsi tərəfindən saxlanılmış, 30 sutkalıq inzibati cəza almışdı.

Nardaran hadisələrindən sonra E.Qasımova Cinayət Məcəlləsinin daha 11 maddəsilə ittiham irəli sürülüb. Bunlar terrorçuluq, dövlət, hakimiyyət, hakimiyyət nümayəndələri əleyhinə cinayətlərlə bağlı maddələrdir.

Qeyd edək ki, ölkə prokurorluğu bu ilin əvvəlində Nardaran hadisələrilə bağlı 70-dən çox şəxsin həbsə alındığı barədə məlumat yaymışdı. -05B-