E.Quliyev: İnanclı insanlara işgəncələr narahatlıq doğurur

Bakı/14.08.17/Turan: Avqustun 14-də bir qrup ictimai fəal həbsxanalarda saxlanılan siyasi məhbusların və dindarların durumu ilə bağlı "Ziyalılar Birliyi"nin ofisində tədbir keçiriblər.

Demokratik Qüvvələrin Milli Şurasının Koordinasiya Mərkəzinin üzvü Eldəniz Quliyev son zamanlar həbsxanalarda saxlanılan şəxslərlə bağıı xəbərlərin cəmiyyətdə ciddi narahatlıq yaratdığını bildirib: "Son zamanlar hakimiyyətin müxalifət düşüncəli insanlara, əsasən də inanclı kəsimə qarşı münasibəti sərtləşib.

Əvvəllər deyirdik ki, hakimiyyət qaşınmayan yerdən qan çıxarır, indi isə gəlib elə bir mərhələyə çatıb ki, artıq qan çıxan yeri qaşıyırlar. Qobustan həbsxanasında baş verən son olaylar da bunu göstərib".

Natiq deyib ki, ölkədə zorakılıq geniş meydan alıb: "AXCP sədrinin müavini Gözəl Bayramlı hamının gözü qarşısında şərlənərək həbs edilib. Jurnalist Əfqan Muxtarlının başına torba keçirilərək Azərbaycana gətirilib, din xadimi Şeyx Sərdar namaz qıldığına görə həbsə alınıb ki, bu da absurdun pik nöqtəsidir".

E.Quliyev "Qobustan" həbsxanasında "Nardaran" məhbuslarına verilən işgəncələrdən danışıb, Müsəlman Birliyi Hərəkatının sədri Taleh Bağırzadənin karsa salınmasını, Abbas Hüseynin çarmıxa çəkilməsini xüsusi olaraq vurğulayıb: "Bu, artıq sözün tükəndiyi yerdir, susmaq olmaz, çünki göz qabağında haqsızlıq, ədalətsizlik, qanunsuzluq baş verir".

Abbas Hüseynin anası Rəhimə Hüseynova deyir ki, iyul ayının 20-dən oğlunu axtarıb, avqustun 5-i Talehin ölüm xəbəri çıxıb: "Məndən gizlədirdilər, sən demə, Abbası orada döyüb incidiblər, dar ağacı kimi asıblar, günün altında işgəncə veriblər. Eynən İsa peyğəmbərə verlən kimi. Bu işgəncələri erməniyə edə bilmirlər, torpaqları satıblar, vətənlərini satıblar, dövlətin malını yeyiblər, neftin pulunu yeyiblər. Biz nə yemişik? Qara çörəklə mən uşaq böyütmüşəm".

Həbsdə olan AXCP sədrinin müavini Fuad Qəhrəmanlının xanımı Zümrüd Yağmur deyir ki, A.Hüseyndən 2 ay xəbər tuta bilməyiblər, ailəsi onu ölü bilirdi, hətta yas mərasiminə hazırlaşırdı: "Mən buradan İlham Əliyevə müraciət edirəm ki, şəhidlik zirvəsinə qalxa bilmədiyi üçün təəsüf hissi keçirən bir adamı siz necə sındıracaqsınız?".

Keçmiş deputat İbrahim İbrahimli deyir ki, 26 ildir ki, Azərbaycanda mübarizə gedir və mübarizənin nəticəsində yüzlərlə, minlərlə insanlar həbs olunub, işgəncə görüblər: "Amma son dövrlərdə bu repressiya aparatı güclənir. Zaman-zaman işgəncələr daha pik səviyyəyə qalxır".

İ.Ibrahimli hesab edir ki, inanclı kəsim addım-addım demokratik proseslərə yaxınlaşırdı, bu isə hakimiyyətin siyasətini artıq iflasa uğradırdı, ona görə də inanclı kəsimə sərt repressiya tətbiq olundu".

"Xural" qəzetinin redaktoru Əvəz Zeynallı deyib ki, hakimiyyət ona problem yaradan qüvvələri sındırıb, indi də ondan narazı olan inanclı kəsimi sındırmağa cəhd edir, amma bu, asan məsələ deyil,

Son olaraq, tədbir iştiraçıları hakimiyyətdən həbsdə olan siyasi məhbuslara və inanclı insanlara işgəncə verilməsini dayandırmağı tələb ediblər. -05B-