Ermənilər orduda fərariliyin artması fonunda müdafəyə hazırlaşırlar

Aprelin 27-də Qarabağda Hərbi Şuranın iclası keçirilib. İclas  hərbi növbətçiliyin möhkəmləndirilməsi məsələlərinə həsr olunub.

Qarabağ qüvvələrinin komandanı Movses Akopyan ümumi vəziyyəti və son vaxtlar həyata keçirilən müdafiə və preventiv xarakterli tədbirləri qiymətləndirib. Bu barədə Arminfo məlumat verib.

M.Akopyan hərbi növbətçiliyin təşkilində komandanların rolunu qeyd edib, komandirləri müdafiəni düzgün təşkil etməyə çağırıb.

Məlumatdan belə nəticəyə gəlmək olur ki, Qarabağda müdafiə məsələsində erməni tərəfin nöqsanları var. Onların aradan qaldırılması və Azərbaycan qüvvələrinin dəf edilməsinin təmin olunması üçün tədbirlər həyata keçirilir.

Son yarım ildə erməni tərəfi 10-a yaxın belə müşavirə keçirib. Müşavirələrdə Ermənistan Müdafiə Nazirliyinin və Baş Qərargahının rəhbərliyi iştirak edib.

Qeyd edək ki, həmin gün Ermənistan parlamentində qanuna icbari hərbi xidmətdən yayınmaya görə cəzanın sərtləşdirilməsini nəzərdə tutan düzəliş edilib.

Əsasən 27 yaşına qədər icbari hərbi xidmət keçməyən və hərbi xidmətdən azad olunmaq üçün əsası olmayanlar hər buraxılmış çağırışa görə cərimə ödəməli olacaqlar.  Cərimənin maksimum həcmi hər çağırışa görə 100 min dram təşkil edəcək. Beləliklə, 27 yaşına kimi bu məbləğ 1,8 mln. dram ($3,76 minə yaxın) təşkil edəcək.   

   2013-cü ildə Ermənistanda 9183 nəfər hərbi xidmətdən yayınıb. 2014-cü ildə bu rəqəm 9918, 2015-ci ilə  9860 olub. Qanunun qüvvədə olduğu müddətdə Müdafiə Nazirliyinin hesabına 800 mln. dram daxil olub.

Öz növbəsində erməni müxalifəti bu qanunu tənqid edir və onun varlı adamların orduda xidmətdən yayınmasına imkan verdiyini bildirir.

Deputat Naira Zoqrabyanın sözlərinə görə, heç kimə sirr deyil ki, yüksək vəzifəli məmurların övladları vaxtında ölkədən çıxarılır, sonra pul verilir, xidmətdən və cinayət təqibindən azad edilirlər. Erməni ordusunda yalnız fəhlə və kəndlilərin övladları xidmət edir.-02D-