Ermənistanda «donuz qripindən» artıq 16 nəfər dünyasını dəyişib

Yerevan/18.01.16/Turan-Armİnfo: Bu gün Ermənistanda “donuz qripindən” daha iki nəfər dünyasını dəyişib. Ermənistan Səhiyyə Nazirliyinin məlumatına görə, vəfat edən hər iki şəxs yanvarın 9-da çox ağır vəziyyətdə xəstəxanaya gətirilib, reanimasiya şöbəsinə yerləşdirilib.

Ümumilikdə respublikada “donuz qripindən” artıq 16 nəfər həlak olub. Bu günə olan məlumata görə, daha 7 pnevmaniya xəstəsi süni nəfəs aparatına qoşulub, həkimlər onların həyatını xilas etmək üçün mübarizəni davam etdirir.

Bu arada, donuz qripi yayılmağa davam edir. Dünən Gürcüstanda bir nəfər vəfat edib, Türkiyədə bir neçə belə fakt qeydə alınıb.

 Azərbaycanda hələlik vəziyyət sabitdir, lakin Türkiyə və Gürcüstanla fəal əlaqələri nəzərə alaraq, qripin Azərbaycana da yayılması tamamilə realdır.

* Donuz qripi (ing. Swine influenza) qrip virusunun bir neçə ştammının insanlarda və heyvanlarda yaratdığı xəstəliyin şərti adıdır. Bu ad 2009-cu illərin əvvəllərində KİV-də geniş yayılıb.

Bu ştamlar ABŞ, Meksika, Kanada, Cənubi Amerika, Avropa, Keniya, Çində ev donuzları arasında yayılmış “donuz qripi virusu” adı ilə məlumdur. Virus daim mutasiyaya uğrayaraq, insanlar və heyvanlar arasında yayıla bilir. -02D-