Əsgər atası: Oğlumun ölümü araşdırılmır

Orduda vəfat etmiş Orxan Alıyevin atası Şirazi Alıyev oğlunun ölüm faktı üzrə istintqın obyektiv aparılmadığını hesab edir. O, bu barədə Turan agentliyinə bildirib.

2013-cü il oktyabrın 11-nə keçən gecə Orxan evə zəng edib, səhəri gün valideynləri onun öldüyü haqqında xəbər alıb. Hərbi hissədən əsgərin ürək ağrısından vəfat etdiyini iddia edirlər.

Lakin mərhumun atası oğlunun heç vaxt ürəyindən şikayət etmədiyini deyir və ölümlə bağlı rəsmi versiyaya inanmır.

Bu iş üzrə istintaq Tərtər hərbi prokurorluğunda aparılıb və nəticə verməyib, heç kim məsuliyyətə cəlb edilməyib. Avqustda iş Respublika Hərbi Prokurorluğua göndərilib.

Atanın sözlərinə görə, baş prokuror mərhumun atasının iştirakı ilə şahidlərin dindirilməsi haqqında göstəriş verib. Lakin bu göstəriş yerinə yetirilməyib.

Ş.Alıyevə görə, müstəntiq şahidləri qorxudub və onları yalan ifadə verməyə məcbur edib. Ata deyir ki, oğlu ilə eyni hərbi hissədə xidmət etmiş əsgərlərin ortaq tanışları ilə yazışmasını istintaqa təqdim edib. Yazışmadan Orxanın telefonla danışdığına görə zabitlərin ona irad tutduqları, bundan sonra əsgərin ölümünün baş verdiyi aydın olur. -05B06-