Əsgər atası oğlunun həlak olması haqqında istintaqın qeyri-obyektivliyindən şikayət edir

Bakı/27.07.21/Turan: Vətəndaş Arif İsmayılov oğlunun hərbi xidmət zamanı həlak olması hallarının obyektiv araşdırılmasına kömək etmək xahişi ilə Azərbaycan ombudsmanı Səbinə Əliyevaya müraciət edib. O, istintaqın oğlunun avtomatdan atəş açaraq özünü öldürməsi barədə rəsmi versiyasına inanmır.

Arif İsmayılovun Turan agentliyinə verdiyi məlumata görə, oğlu Naxçıvan Muxtar Respublikasının Şərur rayonu ərazisindəki hərbi hissələrdən birində ön cəbhədə xidmət edirdi.

Bu il mayın 1-də Aqil İsmayılov xidmətinin 14-cü ayında evə zəng edib və ayın 6-da məzuniyyətə gələcəyini bildirib. Amma mayın 3-də ailəsinə əsgərin yaralandığını bildiriblər, atası Naxçıvana gəldikdə isə ona oğlunun intihar etdiyini deyiblər.

“Mən morqda oğlumun cəsədinə baxış keçirdikdə onun alnından vurulduğunu gördüm. Güllə başının arxa hissəsindən 1,5 sm aşağıdan çıxıb. İnsan avtomatla öz-özünü alnından vura bilməz. Avtomatla adətən çənə altından vururlar. Bundan başqa, avtomatdan atəş açılarkən lüləsindən çıxan alov onun  üzünü yandırmalı idi”, deyə Arif İsmayılov bildirib.

Birinci Qarabağ Müharibəsi veteranı olan atanın qənaətinə görə, oğlu səsboğucusu olan silahdan açılan atəşlə öldürülüb.

“Oğlum səhərə yaxın səngərdə öldürülüb və cəsədi yalnız növbə dəyişdirilən zaman aşkarlanıb. Onun xidmət yoldaşları atəş səsi eşitməyiblər. Əks halda yardıma gələrdilər və onu yardım etmək üçün təhlükəsiz yerə çəkərdilər”, deyə Arif İsmayılov qeyd edib.

O, Naxçıvan Hərbi Prokurorluğunda cinayət işinin Cinayət Məcəlləsinin 125-ci (özünü öldürmə həddinə çatdırma) maddəsi ilə aparılması ilə razı deyil.

“Yazılı və şifahi müraciətlərimizə baxmayaraq, bu müraciətlər araşdırılmır”, deyə Arif İsmayılov bildirib. Onun sözlərinə görə, ailəyə təhqiqatın gedişatı barədə məlumat vermirlər və istintaq nümayəndələri telefon zənglərinə cavab vermirlər.

Ata Azərbaycan hərbi prokuroru Xanlar Vəliyevə şikayətlə müraciət edib, amma onun ərizəsi eyni istintaq orqanına göndərilib.

Arif İsmayılov ombudsmandan cinayət-prosessual qanunvericiliyə uyğun olaraq işin Naxçıvan Hərbi Prokurorluğundan alınıb baxılması üçün Azərbaycan Baş Prokurorluğuna verilməsinə yardım etməyi xahiş edir.

“Biz Naxçıvanda obyektiv istintaq aparılacağına inanmırıq. Heç bir vəkil oraya getməyə ehtiyat edir”, deyə İsmayılov qeyd edib.

NMR Hərbi Prokurorluğundan şərh almaq mümkün olmayıb. -06D-