Əsgər İsgəndərlinin ölümü ilə bağlı vəziyyət müəmmalı olaraq qalır

Müddətli hərbi qulluqçu Pərviz İsgəndərlinin intihar etməsində ittiham olunan iki əsgərin doğmaları mətbuat konfransı keçirərək, həbs olunan əsgərlərin təqsirsiz olduqlarını bildiriblər.

Əsgərlər Şahin Xudiyev, Vüsal İsgəndərli, Vidadi Mustafayev və Sabir Musayevə qarşı 331 (hərbi qulluqçunun təhqir edilməsi, döyülməsi və ya ona işgəncə verilməsi), 332 (hərbi qulluqçular arasında nizamnamədənkənar münasibətlər) və 182-ci (hədələməklə tələb etmək) maddələrlə ittiham irəli sürülüb.

Lakin onlar irəli sürülmüş ittihamları təkzib edirlər, deyə Vüsal İsgəndərlinin babası Ələddin İsgəndərov və Cavanşir Xudiyevin atası Şahin Xudiyev bildiriblər.

Onların sözlərinə görə, törətmədiyi cinayəti əsgərin boynuna qoymaq istəyirlər. 4 əsgərdən yalnız Sabir Musayevin mərhum Pərviz İsgəndərli ilə münaqişəsi var idi. İyulun 11-də onlar dalaşıblar, amma sonradan barışıblar, deyə Ə.İsgəndərov bildirib.

Digər hərbiçilərin danışdıqlarına istinad edən A.İsgəndərov qeyd edib ki, iyulun 13-də axşam kapitan Cavanşir Quliyev P.Iskəndərlidən gözünün altındakı qançırın səbəbini soruşub. Kapitan deyib ki, P.İsgəndərli cavab verməsə cinayət məsuliyyətinə cəlb ediləcək. Amma əsgər yoldaşının adını verməyib. Sonradan kapitan P.İsgəndərliyə bu barədə polkovnikə məruzə etməyi əmr edib.

Bundan sonra P.İsgəndərli yoxa çıxıb və səhər meşədə asılmış vəziyyətdə tapılıb. İyulun 14-də dörd əsgər digər pozuntularla bağlı qaupvaxtaya salınıb, lakin sonradan onlar P.İsgəndərlini intihar həddinə çatdırmaqda ittiham olunublar.

Növbəti gün hərbi hissəyə gələn Ş.Xudiyevin atasına da zabitlər oğlunun əsgərin intihar etməsi ilə heç bir əlaqəsi olmadığını bildiriblər.

Əsgərlərin doğmalarının sözlərinə görə, bütün ittiham əsgər Kənan Ağasıyevin yalan ifadələri əsasında qurulub. O, müttəhimlərin digər əsgərləri döydüklərini iddia edir. A.İsgəndərov və C.Xudiyev həmçinin istintaqı qeyri-obyektiv aparan Hərbi Prokurorluğun müstəntiqi Fəxrəddin İsayevdən və “müstəntiqlə əlbir olan” dövlət vəkili Müşfiq Mehdiyevdən şikayət ediblər. 

Məhbusların doğmaları deyirlər ki, hərbi hissə yaxınlığında yaşayan yerli sakinlər komandirlərin əsgərləri istismar etdiyini, onları fəhlə kimi mülki şəxslərin yanında işlətdiyini deyiblər.

Hüquq müdafiəçisi Ələkbər Məmmədov bildirib ki, 1 əsgərin ölümü və 4 əsgərin həbs olunması orduda özbaşınalığın və anarxiyanın göstəricisidir.

Məmmədov hesab edir ki, iş ona görə rezonans doğuracaq ki, mərhumu cəsədi yarıldığı zaman daxili orqanları alınıb. Mərhumun valideynləri əsgərin ölümcül döyüldüyünü, cinayət izlərinin gizlədilməsi üçün intihara təhrik edildiyini hesab etdikləri üçün cəsədin ekshumasiyasına nail olmağa çalışacaqlar. -06C-