Əsgər ölümü ilə əlaqədar yüksək vəzifəli zabitlər cəzalandırılıb

Müdafiə Nazirliyinin yanvarın 7-də vəfat etmiş Ceyhun Qubadovun xidmət keçdiyi Daşkəsən ərazisindəki hərbi hissədə apardığı araşdırma nəticəsində intizam pozuntuları aşkar edilib. Bu barədə Müdafiə Nazirliyinin mətbuat xidməti məlumat yayıb. Məlumatda qeyd olunub ki, araşdırma əsgərin döyülərək öldürülməsi ilə bağlı valideynlərinin bəyanatları ilə əlaqədar aparılıb. 

Şəxsi heyətə nəzarəti düzgün təşkil etmədiklərinə və buraxılan səhvlərə görə Şəmkir hərbi birləşməsinin bir sıra yüksək vəzifəli zabitləri inzibati qaydada ciddi cəzalandırılıb. Bu barədə mətbuat xidməti məlumat yayıb. Qeyd olunub ki, şiddətli töhmətdən başlamış hərbi rütbənin kiçildilməsinə kimi cəza tədbirləri həyata keçirilib, bəzi zabitlər isə vəzifələrindən kənarlaşdırılıblar. 

Qeyri-rəsmi mənbələrdən daxil olan məlumata görə, ilk dəfədir ki, əsgər ölümünə görə hərbi birləşmənin komandiri, general-leytenant məsuliyyətə (doğrudur, ciddi töhmət formasında inzibati cəza olsa da) cəlb olunub. Adı açıqlanmasa da, qeyri-rəsmi mənbələr onun Rövşən Əkbərovun olduğunu bildirirlər. 

Eyni zamanda C.Qubadovun xidmət keçdiyi hərbi hissənin komandiri mayor rütbəsinə endirilib. Hərbi hissənin bir neçə zabiti vəzifəsindən azad edilib.

Müdafiə Nazirliyi növbəti araşdırmalar zamanı digər zabitlərin də cəzalandırılacağını istisna etməyib.

Bununla yanaşı Hərbi Prokurorluq CM-in 342.2-ci (xidmət zamanı ağır nəticələrə səbəb olan səhlənkarlıq) maddəsi üzrə cinayət araşdırması aparır.

Mərhum əsgərin doğmaları onun ürək çatışmazlığından ölməsi barədə ekspertiza rəyini şübhə altına aldıqdan sonra bu təbirlərin həyata keçirilməsinə başlanılıb. Doğmaları mərhumun bədənində zorakılıq izlərinin olduğunu bildiriblər. Ölmüş əsgərin KİV-də və İnternetdə yayımlanan fotosu sosial şəbəkələrdə və Azərbaycan cəmiyyətində böyük rezonans doğurub.

Yanvarın 12-də bir sıra gənclər təşkilatları Fəvvarələr Meydanında əsgər ölümünə etiraz aksiyası keçirəcəklər.06D-