Əsir və İtkin Düşmüş Vətəndaşlarla Əlaqədar Dövlət Komissiyası 416 ermənini axtarır

Çərşənbə günü Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyasının yaradılmasının 20-ci ildönümünə və 2012-ci ilin yekunlarına həsr olunmuş iclas keçirilib. Tədbirdə dövlət və hökumət rəsmiləri, Beynəlxalq Qızıl Xaç Komitəsinin (BQXK), BMT-nin Qaçqınlar üzrə Ali Komissarlığının, ATƏT-in, Azərbaycandakı nümayəndəliklərinin rəhbərləri və təmsilçiləri iştirak ediblər. 

Dövlət Komissiyasının katibi Şahin Sayılov bildirib ki, son araşdırmalara görə, əsir və girovluqda 553 soydaşımız qətlə yetirilib və ya müxtəlif səbəblərdən vəfat edib.

Hazırda BQXK-nın rəsmi qeydiyyatında olan bir azərbaycanlı əsir Yerevanda saxlanılır. Bu, Azərbaycan ordusunun əsgəri Firuz Mirzə oğlu Fərəcovdur. Erməni tərəfinin bildirdiyinə görə, F.Fərəcov vətənə qayıtmaqdan imtina edir.

Ş.Sayılov bildirib ki, əsirlikdən azad olunmuş 1042 nəfər Azərbaycan vətəndaşından 31-i cinayət əməllərinə görə məhkum olunublar.

Erməni xüsusi xidmət orqanları Azərbaycan azərbaycanlı əsir və girovlardan fəal istifadə edir, onlar vasitəsilə terror və digər düşmənçilik əməllərini həyata keçirirlər. Belə ki, 107 nəfərin erməni əsirliyində olarkən məxfi əməkdaşlığa cəlb olunması faktları aşkar edilib. Onların böyük əksəriyyəti hər hansı düşmənçilik hərəkəti etmədiyi üçün cinayət məsuliyyətinə cəlb olunmayıb.

Son illər 1045 nəfərin taleyinə aydınlıq gətirilib. Müəyyən edilib ki, onlardan 386 nəfəri sağdır, 312 nəfər hərbi əməliyyatlar zamanı həlak olub və meyitləri dəfn edilib, 332 nəfərin adı siyahıdan təkrar keçib, 15 nəfər isə münaqişə bölgəsindən kənarda itkin düşüb. 

Eyni zamanda   147 nəfərin hərbi əməliyyatlar zamanı  itkin  düşməsi faktı aşkarlanıb, baxmayaraq ki, onların 

Yaxınlarından Komissiyaya müraciət daxil olmayıb.

İtkin düşmüş 4031 nəfərdən 877-nin, o cümlədən 22 uşaq, 99 qadın və 133 qocanın əsir-girov götürülməsi, lakin ermənilərin bunu gizlətməsi barədə Dövlət Komissiyasında konkret faktlar var.

Erməni əsirliyindən azad edilmiş vətəndaşlarımızın şahid ifadələri əsasında həmin şəxslərin siyahısı tərtib edilib, onların ilkin saxlanma yerləri və digər faktlar dəqiqləşdirilib. Dəlil-sübutlara baxmayaraq, erməni tərəfi bu şəxslərin onlara əsir düşməsi faktını yenə də inkar edir. 

2004-2012-ci illərdə əsir və girov götürülmüş 22 nəfər BQXK-nın vasitəçiliyi ilə azad edilib.

Dövlət Komissiyası itkin düşdüyü bildirilən və BQXK tərəfindən siyahısı təqdim olunan 416 erməninin də axtarışını diqqət mərkəzində saxlayır. Müəyyən edilib ki, 

onlardan 27 nəfər Azərbaycanın hərbi əməliyyatların getdiyi ərazisində itkin düşməyib. 25 nəfər Ermənistanda, 2 nəfər Gürcüstanda aşkarlanıb. -02D-