Futbol matçlarına şəxsiyyət vəsiqəsi ilə gəlmək lazımdır?

Hakimiyyət Bakıda keçiriləcək Avropa Oyunlarına var gücü ilə hazırlaşır, özünü və qarşıdakı yarışları hər cür “sürprizlər”dən, maksimum təhlükələrdən qorumağa çalışır.

Belə ki, iyunda keçiriləcək oyunlar ərəfəsində idman tədbirlərinin pozulmasına və saxta bilet satışına görə cərimələrin sərtləşdirilməsi hazırlanır.

Aprelin 14-də Milli Məclisin Sosial siyasət komitəsində “Bədən tərbiyəsi və idman haqqında” qanuna və İnzibati Xətalar Məcəlləsinə müvafiq dəyişikliklərə baxılıb.

Komitənin rəhbəri Hadı Rəcəbli deyib ki, cəzaların sərtləşdirilməsində məqsəd yarışların təhlükəsizliyini təmin etməkdir. Əsasən saxta bilet yayımına görə fiziki şəxslər üçün 500 manat, vəzifəli şəxslər üçün 2 min manat, hüquqi şəxslər üçün 5 min manat məbləğində cərimə tətbiq ediləcək.

Biletin öz qiymətindən baha satılmasına görə vəzifəli şəxslər üçün 1,5-2 min manat, hüquqi şəxslər üçün 5-7 min manat həcmində cərimə nəzərdə tutulur.

İdman yarışlarının pozulması cəhdlərinə görə cərimələr fiziki şəxslər üçün 500 manat, vəzifəli şəxslər üçün 2 min manat, hüquqi şəxslər üçün 5 min manat təşkil edəcək.

“Bədən tərbiyəsi və idman haqqında” qanuna edilən düzəlişə görə idman yarışlarına şəxsiyyət vəsiqəsi olmadan, həm də maskada gəlmək qadağan olunur.

Həmçinin sərxoş vəziyyətdə olan, narkotik maddə qəbul etmiş, üzərində vətəndaşlara təhlükə yarada biləcək istənilən növ silah, pirotexnik vasitə, əşya olan şəxslər yarışlara buraxılmayacaq.

Eyni zamanda yarışlara bayraq, emblem, plakat və s. gətirmək qadağan olunacaq.

Müzakirələrdən sonra hər iki düzələş Milli Məclisin sessiyasında çıxarılmaq üçün tövsiyə edilib.02D