Gədəbəy rayon rəhbəri etirazçıların qarşıslına çıxıb

Bakı/21.06.23/Turan: Gədəbəyin Söyüdlü kəndində iyunun 21-də növbəti etiraz aksiyası keçirilib. 

Sakinlər "Kür çayı zəhərlənir", "Düşmən qıra bilmədiyi milləti zavodun sənayesi məhv edir" və s. plakatları qaldıraraq polis şöbəsinə yürüş ediblər. 

Aksiya iştirakçıları bildiriblər  ki, dünən saxlanılanların azadlığa buraxılmasını tələb edirlər.

Onlar deyiblər ki, hamıdan dəstək gözləyirlər. "Körpələrimiz xəstə böyüməsin deyə etiraz edirik". 

Aksiya iştirakçıları dünən baş verənlərə də etiraz ediblər. "Belimdə qrıja var, əməliyyatdan çıxmışam. Məni itələdilər yerdə qaldım. Qaz sıxdılar, nəfəs ala bilmirdik. Amma yenə deyəcəm. Torpağımı tələb edirəm, haqqımı tələb edirəm",- deyə aksiya iştirakçılardan biri qeyd edib. 

Yolda polis əməkdaşları aksiya iştirakçılarının qarşısını kəsib. Daha sonra onların qarşısına Gədəbəy rayonun icra başçısı Orxan Mürsəlov çıxıb. O, bildirib ki, dövlətin vəzifəsi vətəndaşların sağlamlığını və təhlükəsizliyini qorumaqdır. O da Prezidentin səlahiyyətli nümayəndəsi kimi bunu edir. 

İcra başçısı qeyd edib ki, bəzən sakinlər səhv məlumatlandırılır. "Sözügedən göl artıq 11 ildir ki, yaradılıb. Sizin bununla bağlı narazılığınız olmayıb və bu illər ərzində heç kim üçün təhlükə törətməyib. Gəlin göllə bağlı mütəxəssislərin rəyini gözləyək. Narahatlığınız gölün sağlamlığınıza ziyan vurması ilə bağlıdır. Biz bu məsələni çox ciddi nəzarətdə saxlayırıq. Belə bir şey birmənalı şəkildə ola bilməz ki, göl bizim sağlamlığımıza ziyan vursun. Biz də bu ərazidə yaşayırıq. Mən o gölə yaxın yaşayıram. Sizcə mən o gölü təhlükəli bilə-bilə bununla razılaşa bilərəm?"

Sakinlər isə bildirib ki, göl salınandan sonra kənddə xərçəng xəstəliyinə və digər xəstəliklərə yoluxanların sayı artıb.

O.Mürsəlov qeyd edib ki, zavodun fəaliyyəti kənd sakinlərinin maddi rifahına müsbət təsir göstərib. "117 kənd sakini zavodda işləyir". 

O, ikinci gölün salınması ilə bağlı iddiaları təkzib edib.

Örüş torpaqlarının çatışmazılığı və onların əhalinin əlindən alınması iddia ilə bağlı icra başçısı bildirib ki, rayonda yetərincə örüş sahəsi var və əhali həmin torpaqlardan istifadə edir.

Gölün faəliyyətinə gəldikdə isə, o qeyd edib ki, fəaliyyət bitdukdən sonra torpaqlar rekultivasiya olunacaq və əvvəlki vəziyyətə gətirilərək sakinlərə qaytarılacaq. Lakin fəaliyyətin nə vaxt bitməsi ilə bağlı icra başçısı konkret müddətini göstərməyib.

Daha sonra 15 nəfər kənd sakini icra başçısı ilə birlikdə İcra Hakimiyyətinə qəbula qedib. Digər sakinlər isə aksiyanı davam edib.