Gənc fəallarla bağlı ekspertizanın nəticələri obyektiv olacaqmı?

Cümə axşamı Bakı Apellyasiya Məhkəməsi gənc fəallar Bayram Məmmədov  və Qiyas İbrahimovun ev həbsinə buraxılmaları barədə şikayətlərini təmin etməyib. Bu barədə  Turan-a onların vəkili Elçin Sadıqov bildirib.

Xatırladaq ki, gənclər narkotik maddənin qanunsuz dövriyyəsində ittiham olunurlar. Lakin onların həbsinin əsl səbəbi  Heydər Əliyevin abidəsinin üzərində “Qul bayramınız mübarək!” sözlərini yazmalarıdır.

Milli məhkəmələrə həbsdən şikayət imkanlarının tükənməsilə əlaqədar müdafiə tərəfi gənclərin azadlıq və şəxsi toxunulmazlıq hüququnun pozulması ilə bağlı Avropa İnsan Hüquqları Məhkəməsinə şikayət edəcək.

Bundan əlavə, vəkilin sözlərinə görə, işgəncələr üzrə şikayətlərlə əlaqədar Bakı prokurorluğunun qərarı ilə gənclər məhkəmə -tibbi ekspertizadan keçiblər.

 “Onlar ekspertə işgəncələrlə bağlı ətraflı məlumat veriblər, sonra müayinədən keçiblər”, - vəkil bildirib.

Gənclərin səhhətinə gəlincə, vəkilin sözlərinə görə, “onların durumu yaxşılaşıb”.

“Ağrılar xeyli azalıb. Bayramın əlindəki irinli yara yavaş-yavaş sağalır”, - E.Sadıqov qeyd edib.  –06D--