Güclü külək Zaqatala və Balakən rayonlarında təsərrüfatlara ziyan vurub

Ötən axşam güclü külək və leysan yağışı nəticəsində Azərbaycanın şimal-qərb rayonlarına ziyan dəyib. Yerli mənbələrin məlumatına görə, ən çox ziyan Zaqatala və Balakən rayonlarının yaşayış məntəqələrinə dəyib.

Xüsusən, güclü külək yaşayış binalarının və inzibati binaların damlarını uçurub, ağacları və elektrikötürücü xətlərin dirəklərini aşırıb, elektrik enerjisi verilməsini və rabitəni pozub. Balakən rayonunda yerli xəstəxananın damlarına ziyan dəyib.

Yerli hakimiyyət təbii fəlakətin nəticələrinin aradan qaldırılması üzrə tədbirlər görür.

Bu arada, sinoptiklər iyulun 24-də ölkənin rayonlarında yağıntının davam edəcəyini proqnozlaşdırır. Bəzi yerlərdə yağışlar intensiv xarakter daşıyacaq, qərb küləyi güclənəcək.

Havanın temperaturu gecə +20 +25 dərəcə, gündüz +28 +33 dərəcə təşkil edəcək. Dağlıq rayonlarda gecə +12 +16 dərəcə, gündüz +17 +22 dərəcə isti olacaq.

Paytaxtda və Abşeronda hava əsasən yağıntısız olacaq, zəif şimal-qərb küləyi əsəcək.

Havanın temperaturu gecə +22 +24, gündüz +26 +30 dərəcəyə təşkil edəcək. - 06B-