Gürcüstan Apellyasiya Məhkəməsi Fərman Ceyranlının həbs müddətini azaldıb

Bakı/20.12.18/Turan:Gürcüstanda həbsdə olan cərrah, "Lancet" klinikasının həmtəsisçisi Fərman Ceyranlının cəzası azaldılıb. Qərarı dekabrın 20-də Gürcüstan Apellyasiya Məhkəməsi çıxarıb. Bu haqda cərrhın qızı Lalə Hüseynli bildirib.

Onun sözlərinə görə, F.Ceyranlının 6 il müddətinə azadlıqdan məhrum edilməsi barədə hökmdən yazda verilmiş apellyasiya şikayətinə baxış nəhayət başa çatıb: "Məhkəmə bu gün qərarını elan etdi. Atama verilmiş 6 il azadlıqdan məhrumetmə cəzası 2 il 3 ayadək azaldıldı", -L.Hüseynli bildirib. O, qərarın detalları haqda hələlik məlumatlı olmadığını qeyd edib.

L.Hüseynlinin sözlərinə görə, F.Ceyranlı və vəkilləri məhkəmədən bəraət hökmünün çıxarılmasını, atasının dərhal azadlığa buraxılmasını tələb etmişdilər. Sonrakı hüquqi prosedurlar barədə bu günlərdə qərar verəcəklər.

F.Ceyranlı artıq 18 aydan çoxdur ki, həbsdədir. Onun 2 il 3 aylıq cəzası gələn ilin avqust ayında başa çatacaq.

Xatırladaq ki, əslən Gürcüstandan olan F.Ceyranlı 1980-ci illərdən Azərbaycanda yaşayıb, burada təhsil alıb və işləyib.1994-cü ildə M.Topçubaşov adına Elmi Cərrahlıq Mərkəzinin direktor müavini, 1995-ci ildən isə həmin mərkəzin direktoru vəzifələrində çalışıb. O, bir neçə il əvvəl Gürcüstana gedib. Orada "Lancet" klinikasının yaradıcılarından biri olub və ötən il mayın 22-də həbs edilib.

F.Ceyranlı Gürcüstan Cinayət Məcəlləsi ilə dələduzluqda, insanların həyatı və sağlamlığına təhlükə yaradan informasiyanı gizlətməkdə ittiham olunurdu. Cinayət işi klinikada 2017-ci ildə qaraciyər köçürülməsindən sonra vəfat etmiş bir xəstənin qohumunun şikayəti əsasında qaldırılıb.

Tbilisi Şəhər Məhkəməsi bu il fevralın 8-də ona 6 il həbs cəzası verilməsi haqda hökm çıxarıb. Hökmdə vurğulanır ki, məhkəmə zamanı cərraha qarşı irəli sürülmüş dələduzluq ittihamı təsdiqini tapıb.

F.Ceyranlı bildirib ki, o, Azərbaycandan verilən sifarişlə, haqsız yerə həbs edilib. O, bunu Azərbaycan müxalifəti ilə yaxın olması, həm də Gürcüstandakı müəyyən məmurların onun biznesini ələ keçirmək istəməsi ilə izah edib. Belə ki, həbsdən öncə ona təklif olunub ki, klinikanı çox ucuz qiymətə sataraq Gürcüstandan getsin. Ancaq o, bundan imtina edib.-05B-