Gürcüstan prezidenti Əfqan Muxtarlının həyat yoldaşını qəbul edib

Bakı/27.06.17/Turan: Çərşənbə axşamı Gürcüstan prezidenti Georgi Marqvelaşvili Azərbaycanda həbsdə olan jurnalist Əfqan Muxtarlının həyat yoldaşı Leyla Mustafayevanı qəbul edib. Görüş Mustafayevanın xahişi ilə baş tutub.

O, Marqvelaşviliyə həbs edilmiş həyat yoldaşına ifadə etdiyi dəstəyə görə minnətdarlığını bildirib.

Mustafayeva Turan agentliyinə bildirib ki, Marqvelaşvili Gürcüstan rəsmilərindən Muxtarlının Tbilisidə yoxa çıxmasını "oğurlanma" adlandıran və bunu "Gürcüstanın suverenliyinə və təhlükəsizliyinə qarşı təhlükə" kimi qiymətləndirən yeganə şəxsdir.

Bununla yanaşı, Tbilisidə jurnalistin yoxa çıxması və Azərbaycanda həbs edilməsi məsələsinin təfsilatı, Gürcüstanın rəsmi qurumların bunda rolu müzakirə olunub.

Jurnalistin ailəsi Gürcüstanda Muxtarlının oğurlanması üzrə araşdırmanın gedişatından narazıdır.

Mustafayevanın sözlərinə görə, Gürcüstanda istintaqı polis aparır, bir halda ki, polis özü maraqlı tərəfdir, çünki Muxtarlı onu kriminal polis forması geyinmiş şəxslərin oğurladığını bildirib.

Polis yalnız Qərb diplomatik nümayəndələrinin tələbindən sonra araşdırmaya başlayıb. Polis bu cinayətin üstünü necə ört-basdır etməklə məşğuldur.

Mustafayeva Gürcüstanın hüquq-mühafizə orqanlarının Muxtarlının Bakıda dindirilməsinə nail olmaq niyyəti ilə də razı deyil.

"Bu, yalnız vaxtı uzadır. Əfqanı dindirməyə ehtiyac yoxdur, çünki o, artıq oğurlanmanın halları və aparıldığı marşrut haqqında bütün məlumatı bizə verib. Mən artıq bu barədə danışmışam", deyə Mustafayeva qeyd edib.

president.gov.ge

O, baş nazir və daxili işlər və təhlükəsizlik nazirlərindən fərqli olaraq, ilk gündən bu məsələ üzrə obyektiv mövqe tutan Gürcüstan prezidenti ilə görüşün yekunlarını müsbət qiymətləndirib.

Gürcüstan prezidenti məsələni nəzarəti altında saxlamaq niyyətindədir.

Doğrudur, Gürcüstanda prezidentin səlahiyyətləri məhduddur, amma Marqvelaşvilinin prinsipial mövqeyi, ən azından, məsələnin ölkənin ictimai-siyasi həyatının gündəliyindən çıxmasına imkan verməyəcək.

Digər tərəfdən, Avropa Parlamentinin Muxtarlının işi üzrə qətnaməsindən sonra baş nazirin mövqeyi də bir qədər dəyişib, o, əvvəlcə jurnalistin oğurlanmasını qətiyyətlə inkar edirdi. İndi isə o, artıq bu məsələnin araşdırılacağını deyir.

* Muxtarlı mayın 29-da Tbilisidə oğurlanıb və Azərbaycan hakimiyyətinə təhvil verilib. Jurnalist sərhədi qanunsuz keçməkdə, qaçaqmalçılıqda və sərhədçiyə qarşı güc tətbiq etməkdə ittiham edilib.

Ötən həftə Avropa Parlamenti qətnamə qəbul edərək, Muxtarlının azad edilməsini tələb edib. -06B-