Habil Vəliyevin işi üzrə məhkəmədə

Bakı/30.01.18/Turan: "Gündəlik Bakı" qəzetinin baş redaktoru Habil Vəliyevin cinayət işi üzrə məhkəmə prosesi yanvarın 29-da davam edib. Prosesə Fikrət Qəribov sədrlik edib. Əvvəlcə proses iştirakçıları olmadan, amma mətbuatın iştirakı ilə zərərçəkmiş Xəyalə Məlikovanın ifadəsi dinlənilib. Məsələnin mahiyyəti budur ki, X.Məlikova H.Vəliyevin qohumuna 2 min manat verib, sonra pulu qaytarıblar və zərərçəkən əlavə edib ki, müttəhimə hər hansı iddiası yoxdur.

Daha sonra isə proses iştirakçıları zala buraxılıblar.

Daha sonra isə zərərçəkən Hatəm Rəhimov ifadə verərək Surxay Əliyevi ("Bizim dövr" qəzetinin baş redaktoru, o da ittiham edilir) tanıdığını və onun vasitəsilə H.Vəliyevə 22 min manat verdiyini bildirib: Mən otel sahibiyəm. Məni qəzetdə haqqımda yazacaqları ilə şantaj ediblər, mən də pulu verməyə məcbur olmuşam".

Bundan sonra Habil Vəliyev H.Rəhimova "məni tanıyırsanmı, görmüsənmi?" sualı ilə müraciət edib, otel sahibi isə tanımadığını bildirib və müttəhim davam edib: "Mən seçki komissiyasının üzvüyəm, Yeni Azərbaycan Partiyasına xidmət etmişəm, məni belə əməllərdə necə ittiham edə bilərlər, mənim heç bir təqsirim yoxdur".

Digər zərərçəkən Ramin Quliyev firma sahibidir, klinika açıb, məhkəmədə isə bunları bildirib: "Habil Vəliyev öz qəzetində daim mənim klinikam barədə məqalələr yazırdı. Məhkəməyə verdim, şou başladı, H.Vəliyev heç hakimi saymadı, ondan sonra anladım ki, onun arxasında "böyük adamlar" durur, iddiadan imtina etdim.

Mən ona pul vermədim, baxmayaraq ki, məndən 4 min manat tələb edirdi. Sonra eşitdim ki, həbs edilib, hüquq-mühafizə orqanlarına müraciət etdim".

Habil Vəliyev zərərçəkənə heç də hadisənin elə olmadığını bildirib: "Mən məhkəmə olanda gəlmişəm, Ramin vəkili ilə zalda oturmuşdu, mübahisə yarandı, bundan sonra Ədliyyə Nazirliyi məni zərərçəkən kimi tanıdı. Mən səndən nə vaxt pul istədim?".

H.Rəhimov isə cavab verib ki, pulu vəkili Adəm Məmmədovdan istəyiblər, amma buna baxmayaraq, istənilən halda müttəhimə iddiası olmadığını söyləyib.

Daha sonra məhkəmə şahidlərin dindirilməsinə başlayıb, H.Vəliyevin qohumu Pərvin Məmmədov qohumunun günahkar olmadığını bildirib: "Saytda bir obyektlə bağlı tənqidi məqalə dərc edilmişdi. Bundan sonra obyektin sahibi məqalənin saytdan yığışdırılması tələbilə redaksiyaya gəldi, H.Vəliyev onu redaksiyadan qovdu. Həmin şəxs məni tanıyırdlı, odur ki, mənə müraciət etmişdi, mən isə ona H.Vəliyevə təsir edə bilməyəcəyimi söylədim".

Bundan sonra şahidin ibtidai istintaqa verdiyi ifadə oxunub, orada qeyd edilir ki, H.Vəliyev öz saytında "Çahargah" otelinin sahibi Nofəl adlı şəxsin əxlaqsızlıq yuvası saxlaması barədə yazıb, P.Məmmədov Nofəllə H.Vəliyevin söhbətində iştirak etdiyini bildirib və deyib kİ, H.Vəliyev bu şəxsdən "Nova" markalı maşını verməsini tələb edib, bundan sonra isə 5 min manat istəyib..

P.Məmmədov istintaq dövründə anasının müalicəsi ilə məşğul olduğunu, həm də təzyiqlər olduğunu söyləyib: "Mən müstəntiqə də burada dediklərimi demişəm, amma mənim ifadəmi cıraraq, məni həbslə hədələyərək burada elan olunan ifadəni imzalamağa məcbur edib, məni hətta saxladılar da". Bundan sonra hakim şahidə susmağı əmr edib.

Daha sonra şahid Əhmədova dəvət edilib. O bildirib ki, Təhsil Nazirliyində çalışır, müttəhimi qəzet redaktoru kimi tanıyır: "Mən onunla bir neçə dəfə telefonla danışmışam. İş üzrə ancaq bunu bilirəm ki, Beyləqan rayon təhsil şöbəsinin müdirinə H.Vəliyevə zəng etməsi barədə informasiya verib. Biz iclasda idik, H.Vəliyev mənə məlum xahişlə zəng etdi. Amma bundan sonra nə olub bilmirəm".

Başqa şahidlər olmadığı üçün mıəhkəmə prosesi fevralın 8-nə kimi təxirə salınıb.

Xatırladaq ki, "Gündəlik Bakı" qəzetinin baş redaktoru H.Vəliyev 2016-cı ilin dekabrında həbs edilib, hədə- qorxu ilə pul tələb etməkdə, konfidensial informasiya toplanması üçün nəzərdə tutulan texniki vasitələrdən istifadə etmək yolu ilə səlahiyyəti olmadığı halda şəxs və ya şəxslərin barəsində operativ-axtarış fəaliyyəti həyata keçirməkdə şübhəli bilinir.-0