Hacı Cavad məscidi qala bilər (YENİLƏNİB)

Bakı/13.04.17/Turan: Dindarlar Hacı Cavad məscidinin söküntüsünün dayandırılması barədə Azərbaycan prezidentinin göstərişini sevinclə qarşılayıblar. Bu barədə Turan-a   Hacı Cavad dini icmasının rəhbəri Kənan Əzizov bildirib.

Onun sözlərinə görə, məscidin sökülməsinə etiraz olaraq dünəndən başlayan aksiyanın iştirakçıları söküntünün dayandırılması və bu məsələnin həlli ilə bağlı komissiyanın yaradılması barədə qərar elan olunduqdan sonra dağılışıblar.

K.Əzizov qeyd edib ki, dünəndən hakimiyyətlə danışıqlar başlayıb və məsələnin həlli ilə bağlı bir neçə variant nəzərdən keçirilir. Bunlardan biri Yasamal rayonu ərazisində yeni məscidin tikilməsidir. Digər variant Hacı Cavad məscidinin yenidən qurularaq saxlanmasıdır.

Eyni zamanda o, məscidin qəzalı vəziyyətdə olması barədə Mədəniyyət və Turizm Nazirliyinin nümayəndəsinin bəyanatını təkzib edib. 06D--

*   *   *

2017 Aprel 13 (Cümə axşamı) 16:03:12

İ.Əliyev məscidin söküntüsünü dayandırmağı tapşırıb və vəziyyətin araşdırılması üçün komissiya yaradıb (YENİLƏNİB)

Bakı/13.04.17/Turan: Prezident İlham Əliyev Bakının Yasamal rayonunda Hacı Cavad məscidinin sökülməsi ətrafında yaranmış vəziyyətin araşdırılması, binanın texniki vəziyyətinin tam obyektiv qiymətləndirilməsi və müvafiq təkliflərin təqdim olunması üçün komissiya yaratmaq tapşırığı verib. Bu barədə dövlət başçısının köməkçisi Əli Həsənov bildirib.

Onun sözlərinə görə, dövlət başçısı məscidin sökülməsi ilə bağlı vəziyyətdən “narahat olub”. Dindarların reaksiyasını nəzərə alaraq, dövlət başçısı söküntünü dayandırmaq və xüsusi komissiya yaratmaq tapşırığı verib, deyə Həsənov bildirib. -02D-

*   *   *

2017 Aprel 13 (Cümə axşamı) 13:59:11

Hacı Cavad məscidi ətrafında yaranmış vəziyyətlə bağlı

Bakı/13.04.17/Turan: Bakının Yasamal rayonunda Hacı Cavad əscidi ətrafında yaranmış vəziyyət gərgin-qeyri-müəyyən olaraq qalır. Ötən gecə boyunca onlarla dindar hakimiyyətin yeni yol çəkilişi ilə əlaqədar sökmək istədiyi məscid ətrafında növbə çəkib.

Dünən axşam polislə çoxsaatlıq danışıqlardan və qarşıdurmadan sonra hakimiyyət polisə küçəni tərk etmək və məscidin sökülməsinə yol verməyəcəklərini bildirən yüzlərlə dindarı dağıtmamaq göstərişi verib.

Dindarlar qətiyyətlidirlər və onların əksəriyyəti gənclərdir. Hakimiyyət də geri çəkilmək niyyətində deyil, amma hələlik qəti addımlardan çəkinməyə çalışır. -02В-