Hakim cinayət işinin icraatına xitam verib

Çərşənbə günü Naxçıvan şəhər məhkəməsinin hakimi Mehman Allahverdiyevin sədrliyilə Naxçıvan sakini Fərid Əsgərovun hüquq müdafiəçisi İlqar Nəsibova qarşı iddiasına baxılıb.

Hakim cinayət işinin icraatına xitam verib. Hakimin bu qərarı çıxarmasına səbəb noyabrın 4-də İlqar Nəsibovun analoji iddiası üzrə keçirilən məhkəmədə iddiaçının F.Əsgərovu bağışlaması olub. Buna cavab olaraq həmin məhkəmədə F.Əsgərov İ.Nəsibova qarşı iddiasını geri götürüb. Nəticə etibarilə hakim tərəflərin birbirindən şikayətçi olmamasını əsas gətrirərək icraata xitam qərarı çıxarıb. 

Bundan əlavə, məhkəmə İ.Nəsibovun üzərindən polis nəzarətinin götürülməsi haqda da qərar çıxarıb. Amma qərarın 20 gündən sonra icra olunacağı gözlənilir. Bu, tərəflərin qərardan appelyasiya şikayəti verməsi müddətilə bağlıdır. Bu müddət başa çatdıqdan sonra polis nəzarətinin aradan qaldırılması nəzərdə tutulur.

Qeyd edək ki, bu il avqust ayının 21-də Naxçıvanda fəaliyyət göstərən hüquq müdafiəçisi İlqar Nəsibov Fərid Əsgərov və tanımadığı daha bir neçə nəfər tərəfindən ofisində amansızcasına fiziki zorakılığa məruz qalıb. Bu zorakılıq nəticəsində İ.Nəsibov kifayət qədər ciddi bədən xəsarətləri alıb. Müalicə almaq üçün Türkiyəyə getməli olub. Bundan sonra İ.Nəsibov F.Əsgərova qarşı cinayət işi qaldırılması üçün hüquq-mühafizə orqanlarına müraciət edib. F.Əsgərova xuliqanlıq maddəsilə cinayət işi qladırılıb. Cinayət işi qaldırılandan sonra F.Əsgərov da hüquq-mühafizə orqanlarına analoji şkiayət edərək İ.Nəsibovdan şikayəti edib. Nə qədər qəribə olsa da, bu şikayət qəbul edilib, İ.Nəsibova qarşı cinayət işi qaldırılıb.

Noyabrın 4-də İ.Nəsibovun şikayəti üzrə keçirilən məhkəmə prosesində zərərçəkən F.Əsgərovun “qurbanlıq” verildiyini, əsl günahkarların kənarda qaldığını, cavabdehin atası ilə dost olmasını əsas gətirərək, şikayətini geri götürüb. Bundan sonra da F.Əsgərov elə adı çəkilən məhkəmədə İ.Nəsibova qarşı şikayətini geri götürdüyünü söyləyib. -05B-