Hakim tərkibi özünə etiraz etdi

AMAY Şirkətlər qrupunun prezidenti Abdulla Abdullayevin cinayət işi üzrə cümə axşamı hazırlıq iclası keçirilib.

İşə Bakı Ağır Cinayətlər Məhkəməsində baxılıb. İşə baxan hakim Əfqan Hacıyev indiki hakim tərkibinin bu məsələyə 2011-ci ildə AMAY-ın icraçı direktoru  Elşən Novruzovun işilə bağlı baxdığını, o zaman qərar çıxardığını deyərək, hakim tərkibinə etiraz edib. Ə.Hacıyev etirazı Apellyasiya Məhkəməsinə göndərəcəklərini söyləyib. Apellyasiya instansiyasının qərarından asılı olaraq, işə indiki, yoxsa yeni hakim tərkibinin baxması müəyyən olunacaq.

Yeri gəlmişkən, E.Novruzov və daha iki nəfərin mənimsəmə, səlahiyyətdən sui-isitifadə kimi cinayət işinə 2011-ci ildə baxılıb, Bakı Ağır Cinayətlər Məhkəməsi hər bir şəxsə 10 ildən yuxarı həbs cəzası verib. Amma AM bunu əsassız sayaraq, həbsləri şərti cəzalarla əvəz edib.

Hazırda məhkəmə mühakiməsinə çıxarılan A.Abdullayev Cinayət Məcəlləsinin 178.3.2-ci (külli miqdarda ziyan vurmaq), 179.3.2-ci (külli miqdarda mənimsəmə və ya israfetmə) və 308-ci (vəzifə səlahiyyətlərindən sui-istifadə) maddələrilə təqsirli bilinir. A.Abdullayev 2014-cü ilin aprelində həbsə alınıb.

A.Abdullayevin vəkili Osman Kazımlı müdafiə etdiyi şəxsə qarşı irəli sürülən ittihamların cinayət xarakterli olmadığını deiyb. O bildirib ki, bu mülki məsələdir və iqtisad məhkəmlərəində bunu həll etmək olar. O.Kazımlı irəli sürülən ittihamlarda A.Abdullayevin özünü təqsirli bilmədiyini, bu ittihamları əsassız saydığını nəzərə çatdırıb.

Beləliklə, məhkəmə prosesi qeyri-müəyyən vaxta kimi təxirə salınıb. -05C-