Hakimiyyət şəxsi həyatı müdafiə adı altında informasiya toplamaq azadlığını məhdudlaşdırır

Ölkə parlamentinə Cinayət Məcəlləsinə şəxsi həyatın toxunulmazlığının pozulmasına görə cəzanın sərtləşdirilməsi haqqında düzəliş çıxarılıb. Bu əmələ görə cinayət məsuliyyəti nəzərdə tutulub. Parlamentdəki mənbəərin Turan-a verdiyi məlumata görə, düzəliş pilotsuz uçan aparatlardan istifadə ilə “şəxsi məlumat” toplanmasının da şəxsi həyatın toxunulmazlığının pozulması hesab edilməsini nəzərdə tutur.

Düzəliş vəzifə səlahiyyətindən istifadə edən vəzifəli şəxslər üçün ən az 3 il rəhbər vəzifə tutmaq və ya müəyyən fəaliyyətlə məşğul olmaq hüququndan məhrumetmə və ya 2 ilə qədər azadlıqdan məhrumetmə cəzası nəzərdə tutur.

Düzəliş müəllifinin kim olduğu da açıqlanmır.

Hazırda şəxsi həyat haqqında şəxsi və ya ailə sirri təşkil edən məlumatların qanunsuz toplanmasına, bu məlumatları əks etdirən sənədlərin, video və fotomaterialların, audioyazıların yayılmasına, satılmasına və ya başqa şəxslərə verilməsinə görə 100 manatdan 500 manata qədər cərimə və ya bir ilə qədər islahişləri nəzərdə tutulur.

Qeyd edək ki, hökumətyönlü KİV-də bu cür pozuntular geniş yayılıb. Sosial şəbəkələrdə bu faktlar daha çoxdur. Hakimiyyət çox vaxt bu metodlardan siyasi rəqiblərinə qarşı istifadə edir. Jurnalist Xədicə İsmayılovanın və bir sıra müxalifət xadimlərinin intim həyatının çəkilməsini xatırlamaq kifayətdir. Lakin uzun illərdir bu əməllərə görə heç kim cəzalandırılmayıb.

Təklif olunan düzəlişlərə gəlincə, bu düzəlişlər hakimiyyət tərəfindən korrupsiyanı və vətəndaşların hüquqlarının pozulmasını sübut edən faktlara çıxışı maksimum məhdudlaşdırmaq məqsədi güdür. -02В-